Hasta e politiconan a cuminsa fada di e tardansa den e formacion pa un gobierno nobo pa Aruba. E eleccion a tuma luga dia 6 di december di aa pasa, y Aruba ta manera Hulanda cu nan sistema y pensamento politico ta completamente diferente cu e mentalidad di un pais / isla chikito.
Otmar Oduber ta bisa cu berdad e situacion actual di formacion ta inusual. E ta admiti tambe cu den pasado tabatin caso unda cu a tarda pa formacion di gobierno, “pero e circunstancianan tabata diferente”. E ta considera e formacion aki manera un matrimonio cu no tin confiansa, y ta mara esaki na un cantidad di condicion. “No solamente no tin confiansa, pero prome cu e matrimonio ya caba tabatin un competencia di kende ta bisti carson na cas.”
El a duna e ehempel cu AVP ta papia di 9 asiento y FUTURO di 7. Tambe a papia di Secretario di Estado, pero FUTURO publicamente a bisa cu esey lo no tuma luga. Y recientemente cu e candidato pa Minister Plenipotenciario y atrobe FUTURO ta brake AVP. Otro asunto ta e 700 florin cu AVP a priminti pero FUTURO ta bisa cu ta 250 florin por duna. “Bo ta mira un situacion cu no ta sano. Nos ta preocupa.”
Mas preocupa PPA ta pa e echo cu ta na dies dia cu mester tin un presupuesto aproba. Y ta menos di un luna pa decision riba e Rijkswet. No por existi un Rijkswet cu no ta respeta Constitucion di Aruba. “Tempo ta preta … “
El a papia tambe cu e Presidente di Parlamento mr. Gerlien Croes, unda cu a bise cu tin violacion di Reglamento di Ordo. PPA a pidi un reunion publico casi 40 dia pasa y nada ainda. E violacion di e Reglamento di Ordo ta sinta den e echo cu e ta bisa cu den 30 dia mester yama e reunion. Tampoco e reunion riba Rijkswet cu ainda no a tuma luga. No tin transparencia y e pelea di e matrimonio cu na final ta e pueblo ta wordo invita pa e entiero”.
