Otmar Oduber: Ni pito mi a huma den mi bida pio acto corupto

5623

Despues di a delibera cu su abogadonan, ex-Minister Otmar Oduber a dicidi di acudi na oficina di Recherche di Cuerpo Policial Aruba situa na Wayaca. Ey e mester a bay pa keha Michael Williams di a entrega un denuncia falso, calumnia y di ta purba mancha su nomber y otro comerciantenan prominente den comunidad. “Un documento (e keho) cu ta carece completamente di seriedad, puntonan di acusacion cu ta falso”, asina Otmar Oduber a duna di conoce den su declaracion despues cu Polisnan a mand’e bay entrega keho na Ministerio Publico mañan.

Otmar Oduber a corda tur hende cu na december ultimo el a retira di politica y na luna di februari 2020 el a cuminsa cu su mesun negoshi di “consultant”. E ta contento cu hopi comerciante, cu a mira e bon trabou cu el a haci como Minister, cu awo ta contrat’e pa yuda nan cu trabou consultativo.

Ex-Minister Otmar Oduber ta na Recherche pa entrega keho contra Michael Williams pa difamacion

Ex-Minister Otmar Oduber ta na Recherche pa entrega keho contra Michael Williams pa difamacion. E ta insisti cu e no ta corupto!

Posted by 24ora on Monday, June 1, 2020

Oduber a bisa cu awe el a bay keha Michael Williams y Fundacion Nos ta Aruba, pa “Valse aangifte”, “Smaad” y “Laster”. Pero, Hoofdagent Tromp a laga e ex mandatario sa cu e mester pone e keho riba papel y mand’e directamente na Ministerio Publico. Esey ta precisamente locual Otmar Oduber lo haci tambe mañan. El a subraya e hecho cu ni pito el a yega di huma den su bida, corda pa haci actonan di corupcion.

El a termina bisando cu tur e nuebe puntonan cu a keh’e di dje ta falso y sin ningun base. Hopi di nan ta hasta imposibel, manera cu e lo a duna tereno rond di waf y cu e lo a cumpra of huur un incinerator di 300 miyon florin y cu e lo a haya 30 miyon florin di esaki. E no ta corda cu tin un incinerator asina na Aruba, te cu el a cobra placa di esey. Mas bien e ta sinti cu campaña a cuminsa y cu e trein di lastramento di nomber di hende a cuminsa mesora tambe.