Manera a informa for di trempan awe, ex-minister Otmar Oduber, sospechoso principal den caso Flamingo, a recobra su libertad. Den un prome reaccion di Oduber, el a bisa cu ta persiguiendo su yiu homber Jeandrick Oduber pa via di periodismo di shisheria, periodista cu ta purba plama cos, pero cu na final di dia e berdad semper ta alcansa mentira.
Ora cu a puntra Oduber con el a pasa su dianan, el a expresa cu esakinan tabata “hopi duro, mi no ta bay declara nada riba loke ta trata e zaak mes, e investigacion ta sigui y mi ta bay sigui coopera manera mi a bisa nan, pero ta bay yega un momento, Otmar a bandona politica dos aña pasa…y cu lo yega e momento cu politica mester cambia.”
El a sigui pa gradici tur esunnan cu a sosten’e durante su encarcelacion, entre otro, su yiunan, su mayornan, su pareha y demas amistad cu semper tabata t’ey.
Manera Oduber a menciona, e investigacion ta sigui y ta asina nos a compronde for di Ministerio Publico tambe. Pues, aworaki ta di warda wak ta kico tur falta den e investigacion den caso Flamingo. A compronde for Ministerio Publico tambe cu lo apela e decision di hues comisario pa laga Oduber den libertad.
