Otmar Oduber di bishita na Gobernador despues di a reuni cu informador

Otmar Oduber, lider di POR tabata cerca Gobernador. Segun e lider di partido, e combersacion cu el a hiba tabata uno no mucho largo, pa asina duna un recuento di e trabaonan cu Informador, mr. Arie Swaen a haci durante transcurso di e siman cu a pasa. El a entrega su rapport tambe diabierna, di cual awe, dialuna, 9 di October, el a reuni cu e diferente lidernan di partido, pa di e forma ey por yega na e fase final e siman aki, cu lo posiblemente por nombra un formador, cual ta e intension pa mira e disponibilidad cu tin entre e partidonan pa forma un Gobierno y naturalmente asumiendo e responsabilidad di e retonan cu tin p’adilanti.

 

Gobierno di coalicion

Oduber a trece algun punto cu informador lo a sinta y scucha tur hende, pa mira den ki direccion esaki lo bay, mirando cu lider di MEP a indica parti mainta cu gobernador tin un deseo pa e tres partidonan MEP, POR y RED forma un Gobierno. Oduber a splica cu esey tabata cla for di e tarea cu a wordo duna pa informacion den e fase di informador. Esey ta e motibo cu a scucha tur partido den e fase eynan. Awor aki en todo cas, ta exclui un partido cu ta AVP, for di formacion. E ora e tres partidonan e ora MEP, POR y RED mester bay sinta na mesa, hunto cu formador, una bes cu e informador wordo identifica y presenta pa Gobernador. E base ta cu tin un Gobierno di 11 minimo entre partido MEP y partido POR. Naturalmente kier purba di amplia esaki mas cu ta posibel y partido RED a mustra su disponibilidad. A mustra riba e hecho cu tin puntonan cu lo kier combersa riba nan. Tin puntonan di principio cu POR ta para riba dje y e mandato cu tin di partijraad ta condiciona na cierto puntonan. Den e programa di POR, a pone atencion riba varios punto cu a bin dilanti mediante encuesta y encuentro cu instancianan ya caba for di Januari – Februari di e aña aki, cual no a cambia, a keda prioridad y pa POR como partido lo ta prioridad den formacion di un gobierno.

Pero Oduber ta convenci si mira e programanan cu tin den e caso aki di partido MEP y partido RED den cierto forma, ta mira cu tin apertura pa combersa riba e topiconan di importancia pa comunidad. Tin otro topiconan cu tin cu combersa riba nan, cu no lo por forma parti di un posibel plan di gobernacion pa e siguiente 4 añanan.

 

Formador tin cu wordo nombra prome

Te asina leu no a yega na e parti di reparticion di cartera, segun Otmar Oduber. Awor aki prioridad ta cu Gobernador nombra un formador. E prome paso logico ta pa mira entre e tres partido of dos partidonan cu lo tin forma Gobierno pa mira kico e similaridad cu tin, mira cu entre e partidonan por forma un plan di Gobernacion na nivel nacional cu ya caba e ora bo ta baha e bandera di partido, hal’e un banda y pone e puntonan di prioridad pa comunidad padilanti. E ora no ta un programa di partido POR, di MEP of di RED. E ta bira un programa di Gobernacion pa pais Aruba cu ta encera tur hende cu ta biba riba e pida baranca aki, incluyendo esunnan cu no ta forma parti di Gobernacion, den e caso aki cu ta oposicion of minorianan cu no ta forma parti di gobernacion. E plan aki tin cu bira un plan di gobernacion cu ta encera y cu ta na beneficio di tur hende cu ta biba riba nos isla. Una bes cu esey ta identifica, e ora ey bo ta mira ken ta e miho actornan cu bo tin e ora pa atende cu e diferente cartera. Lo bay tin shufflemento sigur, segun lider di POR. A bisa caba anteriormente cu no lo mantene e 9 ministerionan y ta mira segun e prioridadnan. Por mira den e diferente programa di e diferente partido cu e enfasis lo bay cay riba e carteranan nobo, Oduber a splica.