Ordo di Abogadonan di Aruba ta preocupa cu Toque de Queda

9239

Ordo di Abogadonan di Aruba a tuma nota di e decision di Gobierno y di Minister pa prolonga e asina yama “Toque de Queda”, of manera ta yam’e na Hulandes “avondklok”. Di acuerdo cu e ordo di abogadonan, mester ta cla cu na Aruba tur ciudadano tin e derecho di movecion liber (Liberty of Movement). Esaki ta mara den constitucion di Aruba como tambe den diferente tratadonan di derecho humano. Normalmente semper ta purba mas cu por pa evita cu ta limita un derecho constitucional y si no por otro, mester haci’e via ley. 

Hasta si ta existi un ley mes cu ta apodera un Minister cu e autoridad pa haci un infraccion of limitacion riba nos derecho constitucional di por move liber riba nos pais, asina mes e mandatario lo mester cumpli cu normanan di proporcionalidad. Den otro palabra, hasta si un mandatario, pa ley, tin e autoridad pa anuncia un Toque de Queda, ainda e mester puntra su mes si e medida tuma bou di e circunstancianan ey no ta bay demasiado leu mirando e meta pa cual a otorg’e e dicho autoridad y e mesun mandatario lo mester analisa si e por logra e mesun meta kisas uzando otro tipo di medida y instrumentonan cu ta menos pisa cu un Toque de Queda. No tin ningun discusion posibel riba e pregunta cu si e Toque de Queda ta un infraccion pisa riba e derecho constitucional di cada ciudadano. Esey ta un realidad!

Desde dia 30 di November 2018, e Ordo di Abogado ta consisti di mr. Ronny Wix como Decano, mr. Johan Sjiem Fat como Vice Decano, mr. Demis Illis como Comisario, mr. Lianne Pieters como Tesorero y mr. Gabriela Sjiem Fat como Secretario. A scoge e directiva nobo pa un periodo di dos aña, cu a drenta na vigor entrante Januari 2019.

Ordo di Abogadonan di Aruba ta preocupa riba tanto e legalidad como tambe riba e proporcionalidad y subsidiaridad di e Toque de Queda anuncia dor di Gobierno di Aruba. Pa cuminsa, a anuncia Toque de Queda sin cu tin of tabatin indicacionnan concreto cu ciudadanonan ta core mas risico anochi pa contagia cu Coronavirus compara cu den dia. Banda di esey, Aruba a alcansa un fase, den cual ta suavisando poco poco tur e medidanan anuncia dor di Gobierno pa combati Covid-19. Riba e punto aki Aruba ta siguiendo e tendencia mundial. Claro cu tur hende lo a imagina, cu ora Gobierno cuminsa suavisa e medidanan impone, cu lo start cu esun mas pisa y cu ta e infraccion di mas grandi riba nos bida diario, esta e Toque de Queda. Lamentablemente esey no a sosode.

E cantidad di detencionnan desde cu a start cu Toque de Queda te cu awe. Por nota cu na inicio e tabata mucho mas, aunke constantemente e cifranan ta keda subi y baha!

Gobierno a duna di conoce cu e medida di Toque de Queda a yuda na baha criminalidad. Ora cu Gobierno mes a anuncia esaki, e no a tene cuenta cu nunca a introduci un Toque de Queda pa combati criminalidad, sino como medida di precaucion pa evita plamamento di Covid-19. Na e momento aki, criminalidad no ta duna ningun sorto di indicacion di ta un calamidad pa cual lo mester a activa e Calamiteitenverordening, pasobra di ningun forma ta papiandi di cu tin un crecemento enorme di criminalidad, sino ta e percepcion of idea cu esey lo ta sosodiendo. Di otro banda, prevencion di criminalidad no ta duna ningun base legal pa mantene e Toque de Queda na e momentonan aki.

Asina Cuerpo Policial Aruba a promove e decision tuma dor di Minister Presidente riba nan rednan social.

E Toque de Queda ta e medida di mas pisa cu Gobierno di Aruba a tuma den cuadro di combatimento di e Coronavirus. E medida aki lo mester a bira e prome cu ta elimina, pasobra un limitacion di un derecho constitucional no por dura mas di loke ta estrictamente necesario! 

Cu e realidad aki riba mesa, Ordo di Abogadonan di Aruba ta preocupa cu e necesidad, cu e proporcionalidad y e legalidad di e medida aki. Esaki ta haya mas rason si tuma na cuenta e decenas di detencionnan cu a tuma luga di ciudadanonan, kitando nan libertad, dunando nan boet, djis pa e hecho cu nan a sali for di nan mesun cas.