Orco Bank a komprometé dinobo pa un periodo di tres aña komo patrosinadó prinsipal di e fundashon Ride for the Roses Curaçao. Djaluna dia 18 di desèmber gerensia di e banko a firma e konvenio ku e fundashon ku ta para pa organisashon di e proyekto anual mas grandi pa rekoudá fondo na Kòrsou na fabor di e lucha kontra kanser i e sosten na pashènt di kanser i esnan mas yegá na nan.
Ya for di 2006 Orco Bank ta fungi komo spònser prinsipal di e evento deportivo ku partisipashon tur aña di alrededor di 10 mil persona di tur edat. Ku e kontrato ku a firma ayera, Orco Bank ta komprometé atrobe ku e Ride pa e añanan 2018, 2019 i 2020, ku e opshon pa despues prolongá e laso un biaha mas. E fundashon Ride for the Roses ta apresiá e aktitut konstruktivo aki di e patrosinadó prinsipal Orco Bank inmensamente. E siguiente edishon ta djadumingu dia 21 di yanüari 2018 pa Ride (kore baiskel), Swim & Walk for the Roses, miéntras un siman promé riba dia 14 di yanüari ya tin e Sail for the Roses.
E konvenio prolongá di patrosinio a haña firma na nòmber di Orco Bank di señora Milouzka (Milli) Sprock (Managing Director Finance & Operations) i Kenny Canword (Managing Director Commercial Affairs, ámbos na man drechi riba potrèt) i na nòmber di Ride for the Roses di Robbin Martina (presidente, meimei) i Benno van Leeuwen (sekretario).
