Dienst Technische Inspectie tin algun tempo caba operando na nan sede nobo na Barcadera unda cu tin ekipo moderno pa haci e trabounan di keuring cu ta tuma luga na e sitio.
Den combersacion cu Anko Koopmans, director di DTI, el a splica cu nan ta haci rond di 140 keuring di vehiculo pa dia. Esaki ta un cifra averahe.
E cifra aki ta depende di tur e personanan cu tin un vehicuo cu mester ta consciente cu nan auto mester tin un declaracion positivo di DTI pa nan ta riba caminda coriendo. Nan a constata si cu ora tin controlnan policial, tin mas hende ta presenta pidiendo un cita pa keur nan auto. Koopmans ta kere cu cada persona mester ta mas consciente di nan responsabilidad pa subi caminda cu un auto of otro vehiculo cu tecnicamente ta cumpli cu tur reglanan of ley. Si bo auto no ta cumpli pa ley y bo causa un accidente, kisas cu bo por a evita si e auto tabata bon, lo bo wordo teni responsabel pa esaki. Bo por evita cu un ciudadano ta bira victima di bo negligencia.
Loke si ta constata hopi ta cu hendenan ta haci cita, pero ora cu e fecha yega, nan no ta presenta. Esaki ta lamentable pasobra placa ta bay perdi. Y DTI ta trata di duna un servicio mas lihe. E personanan aki no ta cumpli ta stroba otronan cu si kier haya “goekeuring” di nan vehiculo. “Nos ta traha tur dia mas lihe y mas miho. Nos ta scucha e sugerencianan cu e hendenan ta laga atras.” Asina den e ultimo dianan a haci un cambio chikito, y e hendenan ta warda menos pa yega na turno pa haci e keuring.
Tin mas plan y entre otro algun procedura cu oor bay online. Esaki lo evita acumulacion di hendenan den e parti di entrada unda e personanan ta warda pa wordo atendi. Sinembargo e cambionan aki ta depende di e recursonan financiero cu tin disponibel. E cambio aki por haci cu nan ta integra cu otro departamentonan cu nan ta traha cun’e.
Apesar di e cantidad di auto particular y otro vehiculonan cu tin riba caya, esey no ta imposibel pa DTI atende cu nan. Hopi ta auto nobo y ta despues di tres aña mester bay keuring. Aunke cu tin rond di 70 mil number, un poco mas cu 50 mil ta keda pa wordo gekeur. Nan tin espacio pa atende mas auto. Aña pasa a keur un total di 40% di e total di autonan na Aruba y ta kere cu nan por atende mas. “Sigur nos no ta na nos limite,” Koopmans a bisa.
Koopmans ta recien den e puesto y no por haci un comparacion pa antes, pero e ta contento cu e servicio di awor cu tin 3 espacio pa auto y uno pa brommer. Pues espacio pa keur auto nan tin, ta e clientenan mester yega,
Nan ta habri di dialuna pa diabierna di 7.30 pa 11.30 y 1’or pa 3.30. Caha ta habri pa 7.45 y e ora por cuminsa haci cita y nan tin e mesun horario por lo demas cu e keuringnan. Tin biaha si tin chens, ta tuma hende cu no tin afspraak. E mester ta posibel den e schedule si.,
