Pa celebra e hecho cu dia 26 di augustus venidero OPPA ta celebra su 30 aña di existencia, OPPA a traha un programa cu actividad diversifica pa su miembronan.
Pa e motibo aki OPPA ta manda un invitacion special na su miembronan pa participa activamente na e diferente actividadnan, reparti durante 2 siman. Lo tin presentacion y demostracion di On-Line Banking y otro servicionan bancario mas di Aruba Bank, RBC y CMB. E presentacionnan aki ta pa e miembronan clientela di cada banco y tur lo tuma luga na Biblioteca Nacional na Playa. Tambe ta bay tin un charla di dr. Viana combina cu demostracion di diferente remedi natural y suplemento cu ta bon pa nos salud, pa cortesia di Oduber Agencies. E charla aki lo tuma luga na SIMAR. Tambe ta bay tin un demostracion di cushinamento saludabel. Durante e mainta aki Oduber & Kan tambe lo tene un charla tocante diferente malesa di wowo y alabes e miembronan lo tin oportunidad di controla nan oido. E actividad aki lo tuma luga na YMCA, Dakota. Un otro colaborado riba OPPA su programa ta SETAR, cu tambe lo duna presentacion di su servicionan, entre otro pago On-line. Y pa cera e programa lo tin e grandioso fiesta bailabel na Renaissance Convention Center.
E programa di Hubileo 30 reparti riba dos siman:
Diamars 14 di augustus – Presentacion di Aruba Bank N.V.
Diahuebs 16 di augustus – Charla di dr. Viana etc.
Diasabra 18 di augustus – Demostracion di cushinamento saludabel etc.
Diamars 21 di augustus – Presentacion di Banco RBC
Diahuebs 23 di augustus – Presentacion di Setar N.V.
Diabierna 24 di augustus – Presentacion di Banco CMB
Diadomingo 26 di augustus – Fiesta bailabel
OPPA ta haci un apelacion riba su miembronan cu tin nan propio laptop, Smartphone of tablet, pa trece esaki durante e presentacionnan di e banconan y Setar. Tin un cierto cantidad di computer so disponibel na Biblioteca Nacional.
Cuminsando desde diamars 7 di augustus, e miembronan por pasa oficina di OPPA pa registra y cuminsa busca nan carchinan, completamente gratis. Tambe ta informa e miembronan pa tene cuenta cu tin un limite na e cantidad di participante pa cada actividad. Ta deseo di OPPA pa mas miembro posibel haci uzo di e oportunidad aki pa amplia nan conocemento y educa nan mes riba tereno di tecnologia moderno y tambe pa haci e miembronan mas consciente ainda pa nan hiba un bida mas saludabel posibel.
