Na aña 1988, dos aña despues di Status Aparte, un grupo di pensionado publico a realisa cu e pensionadonan publico tabatin e necesidad di tin un representacion fuerte den nos comunidad y a funda OPPA, Organisacion di Pensionado Publico Arubano.
E organisacion a cuminsa cu mas of menos 59 miembro y actualmente OPPA tin mas cu 1600 miembro. Durante e aña cu a pasa e organisacion aki a traha duro pa haya un reconocemento como partner consultativo for di gobierno y e otro instancianan cu ta comprometi cu interes di su miembronan.
OPPA tin laso cu otro organisacion di pensionado pafo di Aruba, manera UPAH, Union Pa Adelanto y Husticia, di Corsou; BGNAA, Bond van Gepensioneerden van de voormalige Nederlandse Antillen en Aruba cu cede na Hulanda y BBGO, Bond voor Belangenbehartiging Gepensioneerden uit Overheidsdienst, di Surnam.
OPPA ta representa un capital humano enorme cu talento, sabiduria y yen di experiencia. Ex-trahadonan publico cu a traha duro y cu nan trabou a contribui grandemente na loke nos tin awe. E generacion di pensionado publico, ta ex-trahado cu a lucha pa algun causa digno y husto manera democracia y paz; pago igual pa trabou igual; igualdad p’e hendenan muhe; eliminacion di racismo, etc..
Ta p’esey tur pensionado publico merece e respet y atencion di gobierno, nan famia y henter nos comunidad.
E añanan a pasa y awo e lucha di e grupo di pensionado ta otro. Awo nos lucha ta contra e DISCRIMINACION CU TIN CONTRA NOS GRANDINAN, simplemente pa nan edad.
Un sociedad cu ta considera e adultonan mayo un carga social, hende cu deterioro fisico y enfermedad, persona inutil y cu ta depende di otro, persona cu mal memoria y un analfabetismo digital.
OPPA sigur no ta acepta e alegacionnan aki y ta urgi gobierno pa institui e “Ouderenraad” lo antes posibel. Nos kier sa kico Gobierno ta bay haci cu nos!
Te ainda nos tin bon memoria, nos ta dicidi pa nos mes y nos no ta permiti ningun instancia / gobierno pusha nos den un skina!
E rol di e pensionadonan den un comunidad ta di un balor incalculabel y nos sociedad cu ta uno educa, mester probecha y duna un oportunidad real na e grupo di persona cu hopi experiencia y conocemento. Mester ofrece nan un oportunidad real pa keda activo!
Nos ta spera cu nos politiconan bira conciente y realisa cu no por sigui neglisha e grupo aki, pasobra e realidad ta, cu e bida cu e pensionadonan ta bibando tur dia ta comiendo nan poco poco, pero cu hap grandi!