OPPA: No ta satisfecho cu contesta di gobierno durante Cumbre riba pensionadonan

640

Organisacion di Pensionado Publico Arubano (OPPA) a sigui e Cumbre di Gobierno di diaranson, dia 12 di augustus, y pa nan esaki tabata un reunion informativo. Aki gobierno tabata splica su plan y loke Hulanda a ofrece nan.

Ivo Valdez, presidente di OPPA, no a mira nada a cambia, pero algun palabra esta nomber di cierto instancia cu nan ta bay forma a cambia. Pa loke ta trata e edad di pension na luga di hisa esaki na 67 aña, nan kier bah’e 1 aña. E tin miedo p’e edad di pension ta bay subi, door di e negociacionnan.

E ta haya straño cu e gremionan sindical no a reacciona riba e punto aki. OPPA ta un organisacion cu ta representa pensionadonan, p’esey el a trece algun preocupacion padilanti. El a expresa di no tabata satisfecho cu e contesta ricibi di parti gobierno. Esaki pa motibo cu e situacion laboral na Aruba ta diferente cu esun di Hulanda. E otro motibo ta e cantidad di ora cu ta traha te ainda den cierto sector, hotelero, y tambe e situacion bou cuerpo laboral riba por ehempel e cantidad di trahado di 25 pa 45 aña di cual tres di cada cuater tin sobrepeso. Tur e situacion ey y estilo di bida di trahadonan lo hunga un rol grandi den futuro riba e sistema laboral y fondo social, esta AZV. Esakinan ta loke gobernantenan no ta tuma na serio.

Covid-19 a bin pa habri wowo di hendenan y nan por mira cu no por sigui asina mas. Tin cosnan cu no ta cuadra pasobra pensionado di gobierno ta cobra dos pension mientras cu esun di priva ta cobra uno. Den e caso aki ta kitando tanto porcentahe y e trahado publico ta kere cu e placa ta yega na su destinacion, ya cu nan ta kere dia nan cuminsa cobra pension nan lo haya ambos. No tin un control y pa su persona esaki ta un ladronicia. Gobierno ta introduci ley y nan mester percura pa reenforsa ley. Tin cu reenforsa tur ley, pasobra por mira cuanto fraude ta pasa ya cu no tin instancia cu ta controla a base di ley.

E grupo di pensionado, e grupo di hende grandi ta esun di mas lubida, el a bisa. Ta bayendo den direccion di 25 mil y no por ta asina. Pasobra un hende a bira grandi ya su bos no tin balor mas. Tur pensionado publico y di priva ta contribui grandemente cu comunidad Arubiano.