E organisacion di pensionadonan OPPA no por otro cu cataloga aña 2020 como uno desastroso. Hopi cosnan malo a pasa, hopi proyecto cu no por ehecuta. Pero asina mes, nan ta prepara pa sigui cu e lucha den 2021.
Na final di 2019 yen di entusiasmo a traha riba nan plan di 2020, pero hopi di actividadnan no por a tuma luga door di COVID, Ivo Valdez, presidente di e organisacion di pensionadonan OPA, a duna di conoce.
Apesar cu nan a sufri dos derota den casonan cu nan a lanta contra gobierno, ahustacion di pensioen y primanan cu pensionadonan di 2015 bay ariba no ta haya, nan tin cos positivo tambe. Despues di hopi aña a logra haya un tereno pa construi nan sede. Awo e edificio a yega te na e parti di dak caba.
Aña 2020 ta uno fastioso pasobra hopi di e miembronan debi na nan edad no por sali riba caya, pero tambe a perde miembronan, en total 21 cu a fayece. “Ban spera cu otro aña cos cambia y bisa ayo na e aña mas desastroso cu Aruba a conoce.
Aña 2021 tambe ta un aña pisa, mirando cu e ta un aña di eleccion. E lesnan di 2020 e ta spera no tabata algo cu e pueblo a siña di dje pero e gobernantenan tambe. Aruba no por depende solamente di un pilar economico. Mester busca mas lihe posibel un di dos pilar. E maneho di gobierno tambe mester bira uno mas balansa. E ta bisa cu e grandinan mester haya mas atencion y miho cuido, algo cu nan ta pidi pa hopi tempo caba. Votadonan mester bira mas consciente y pone un fin na e fenomeno di priminti durante campaña hopi cos pero ora cu yega den gobierno ta lubida tur esakinan.
