Oportunidat nobo pa sòftbolistanan di 14-18 aña

RBI Curaçao Softball i Curaçao Little League Softball (CLLS) ta orguyoso di por anunsiá inisio di kampionato pa hóbennan di 14-18 aña. Despues di basta interkambio di pensamentu kon pa hinka un kampionato asina aki den otro a yega na un akuerdo.

Dirigentenan di tantu Curaçao Baseball Development Foundation (CBDF) bou di kual RBI Curaçao ta kai i Curaçao Little League Softball ta kere ku sin duda esaki lo kontribuí na desaroyo positivo pa nos sòftbolistanan femenino den grupo di edat aki.

E último dos añanan (2018 i 2019) RBI Curaçao a partisipá den torneo regional di RBI Baseball ku ta kai direktamente bou di MLB. E ofisina sentral di RBI ta sumamente kontentu ku e partisipashon di Kòrsou den e torneo i asta den 2018 a logra yega Serie Mundial. Semper e pregunta ta surgi ki dia Kòrsou ta presentá ku un ekipo di RBI Softball. Kada bes esaki ta bira mas insistente di parti di RBI i porfin por bisa ku e aña aki esaki ta bira un realidat. Manera ta konosí RBI ta kai bou di Curaçao Baseball Development Foundation (CBDF) ku ya tin 5 aña ta organisá e torneo di RBI pa Kòrsou. E akuerdo ta pa organisá un kampionato di 12 wega pa e hóbennan di 14 pa 18 aña ku aktualmente no tin temporada pa hunga aden i ku no ta biaha pa eksterior ku selekshon. Manera ta konosí Liga Soraida Juliana a kuminsá fin di siman tras di lomba i ta bai te ku e edat di 14 aña.  

Supervishon di e torneo lo kai bou di un komishon presidí pa presidente, Sr. Cijntje. Fundashon pa Nan lo ta enkargá ku e parti organisatorio manera ta e kaso ku baseball i tin amplio eksperensia kaba ku esaki. Un total di 4 organisashon lo partisipá na e torneo aki di 3 siman. Ta trata aki di Braves, Red Sox, White Sox i Tigers. 64 hóben lo partisipá den e torneo i na final e ekipo ku mihó rèkert ta sali kampion. E ekiponan ta konsistí di hungadónan di diferente organisashon di CLL i huntu ta forma e ekiponan. Durante e tres fin di siman kuminsando djasabra 7 di mart kada ekipo lo hunga dos wega riba e fecha aki i dos wega riba djadumingu pa asina kompletá e 12 wega nan. Tur e weganan lo tuma lugá na Post 6 for di 9or di mainta.       

Kada ekipo lo konsistí di 16 hungadó i 3 coach i lo ta di tres organisashon di CLLS, Sta. Rosa, Buena Vista i Souax. E organisashonnan aki ta afiliá tambe na Curaçao Softball Bond (CSB).  Despues di kampionato lo forma un selekshon di hóbennan di 14-18 aña ku lo kompetí den e torneo regional na Vero Beach. E selekshon lo konsistí di 15 hungadó, 3 coach i 1 delegado. Curaçao Baseball Development Foundation (CBDF) lo patrosiná a kampionato i tambe e biahe di selekshon pa Vero Beach. RBI Curaçao Softball i Curaçao Little League Softball ta premirá un promé kampionato eksitoso.