E fin di siman aki ta tuma luga e di cinco edicion di Playa Film Festival. Tin un programa amplio cu diferente actividad, cual ta inicia diabierna y ta finalisa diadomingo. Aunke cu tin orador local como internacional pa papia riba traha pelicula den Caribe, a duna oportunidad na tres scol secundario pa crea short film cual lo ta pasa diasabra.
Juan Francisco Pardo, coordinador di proyecto Fundacion Cine Aruba, a conta cu esaki ta di cinco aña cu nan ta organisa e festival di film. Diabierna anochi ta e ‘opening night’ y ta cuminsa c’un presentacion documentario di Rebecca Roos riba Alice van Rommondt. Publico por mira e documentario y Roos mes lo ta presente pa papia riba su documentario. Tambe tin oportunidad di haci pregunta.
E edicion aki pa prome bes e lo ta den Caribbean Cinemas. A crea un programa di dos sesion di presentacion di pelicula, cual ta tuma luga riba diasabra y diadomingo. Diasabra desde 2:00 pm tin riba programa panel cu e cineastanan. Ta conta cu cineasta local como di Caribe y internacional. Durante e panel lo papia di cine den Caribe y Reino. Segun Pardo, nan kier sa e perspectivanan di e cineastanan den nan ciudad of pais, con nan ta resolve obstaculo. E sesion aki ta uno gratis y oportunidad pa tur hende haya sa mas informacion y haci pregunta n’e e cineastanan.
Despues ta tuma luga ‘Stories from the Heart’, unda lo pasa pelicula cortico internacional, documentario. Tambe nan tin un seccion di ‘Short School Story.’ Ta conta cu participacion di tres scol secundario cu ta EPB Hato, EPB San Nicolas y Maria College. E hobennan a traha documentario di 1 minuut di nan scol y lo presenta esaki. E publico presente ta haya chens di vota p’e miho storia, cual t’un categoria nobo p’e peliculanan di Aruba na Papiamento.
Tin e categoria popular cu ta ‘Kingdom of Shorts’ y ta parti den dos parti. Ta pas’e tanto diasabra como diadomingo. Diasabra ta pasa e peliculanan di Aruba, Corsou y Hulanda. Diadomingo ta 4:00 pm ta sigui e dos parti di ‘Kingdom of Shorts’ y anochi tin e clausura.
E ta invita tur hende pa yega e fin di siman aki pa mira e peliculanan cortico.
