Siman pasa nos a organisa un encuesta riba e pagina di Facebook di 24ora.com relaciona cu e forma di construi rotonde riba caminda na Aruba. Esaki despues di varios accidente, di cual un fatal, riba e rotonde banda di Super Food.
Un total di 5200 usuario a participa activamente den e encuesta. Un mayoria limita di 53% a vota contra construccion di rotonde cu muraya di beton tur rond. Pero 47% si ta na fabor di e tipo di construccionnan asina, pa evita cu ta subi e rotondenan aki constantemente.
Mientras un grupo ta sinti cu no por culpa e rotondenan pa e accidentenan tumando luga, otronan ta enfoca mas riba stuurmento burachi of den forma iresponsabel. Tabatin opinionnan cu si mester adapta construccion di rotonde, cu despues e mesun grupo lo por pidi pa kita tur palo di luz tambe for di band’i caminda, pa evita cu automobilistanan ta dal den nan.
Di e forma aki por mira claramente cu e opinionnan ta basta dividi riba e topico aki.9
