Diaranson atardi Parlamento Hubenil a tene su opendag. Leonardo Figaroa, vicepresidente di PH, a splica cu nan a invita hobennan interesa, p’asina haya sa kico Parlamento Hubenil ta y kico nan ta haci.
Segun Figaroa, a bin varios hoben entusiasma y a mustra interes enorme. Esaki ta yena e miembronan cu un satisfaccion cu tur e trabao y esfuersonan cu nan a haci den tur e dianan aki a conclui.Tanto dialuna, diamars y diaranson, nan a haci un radiotour, cu a resulta hopi bon. E informacion cu a yega na pueblo di Aruba tabata importante y tambe pa hobennan sa kico Parlamento Hubenil ta y kico nan ta haci.
Esaki a “payoff” den tur forma, segun Figaroa. Nan ta sumamente contento cu e reaccion y respaldo pa esaki.PH ta un fundacion cu ta basa riba derechonan di mucha. Nan tin como meta no solamente pa crea lidernan di mañan cu confiansa propio, pero tambe desaroya nan habilidadnan comunicativo y social. E vision ta pa tin hubentud cu ta debati, pa cultiva un cultura di debate rond di e hobennan. Door di debati por yega na solucionnan eficiente y mas rapido tambe, cu ta concerni e hubentud di Aruba.
PH ta un inversion pa futuro. Cada hoben cu bay eynan tin cu wak PH como un inversion pa mañan. Nan tin varios curso of tayer, cu tin como meta pa desaroya e hoben su habilidadnan. Tambe nan tin charla cu tin como meta pa expande e conocemento general di e hoben y tambe tin nan consehonan unda cu e hoben tin e voz pa trece nan preocupacionnan dilanti. Por tin algo ta pasa na scol y por trece esey dilanti. Por ta esey por bira un proyecto of iniciativa.
Fuera di esey nan tin nan proyectonan cu nan ta haci pa e hobennan di Aruba, cu no por forma parti di PH, pero por haya un idea y toch por forma parti di PH pa un rato y no full e aña.Loke tin den pipeline aworaki, cu e fluho di miembronan nobo, ta pa sinta den un reunion y brainstorm prome kico ta nan opinion. Sigur pueblo lo haya sa mas despues ki proyectonan lo tin. Tin ideanan cu nan tin cu concretisa y despues lo tende di nan den forma di proyecto, Figaroa a bisa finalmente.
