Awe algun area rond di nos isla a confronta awasero fuerte y algun inundacion. Servicio Meteorologico Aruba ta informa cu pa awe manece diadomingo marduga e tempo lo ta parcialmente te temporalmente hopi nubla y cu posibel awasero local.
E biento lo ta di direccion Oost y lo ta modera te basta fuerte. E forsa ta di 4 te 5 (20 te 39 km/ora, 11 te 21 nudo). Den dia e rafaga lo ta fuerte y cu forsa di 6 te 7 (40 te 61km of 22 te 33 nudo). E situacion general di tempo pa proximo 24 ora ta humedad cu ta laga atras pa un ola tropical y lo por produci awasero cu un chens chikito di strena y lamper. Esaki principalmente diadomingo marduga y mainta.
Den transcurso di awe nochi laat pa diadomingo mainta un otro ola tropical lo drenta e parti oost di Caribe. Por bisa cu otro nubia di stof di Sahara lo ta pasando den area di Caribe cu concentracion varia y cu visibilidad un poco reduci. P’esey ta sugeri personanan cu dificultad respiratorio y alergia pa tene cuenta cu esaki. E concentracion lo ta menos cu siman pasa y lo baha den curso di comienso di otro siman.
Pa loke ta trata e condicionnan maritimo ta spera den e proximo 24 oranan cu esaki lo ta den un estado modera te poco bruto. Olanan lo ta for di oost entre 5 pa 8 pia. E olanan di mas halto ta na e partinan oost te noordwest. Meteo ta avisa doñonan di botonan chikito pa bay cu cautela riba lama y cu esaki ta na vigor p’e partinan oost te noordwest di costa.
Potencial di awasero pa e proximo 24 oranan ta di 3 te 7mm, pero esaki por varia. E pronostico di tempo pa proximo 3 dianan ta parcialmente nubla, cu awasero breve. Biento lo ta for di direccion oost, modera te cu rafaga basta fuerte. E temperatura maximo lo ta di 33 grado Celsius y minimo di 27 grado Celsius.
