Ola tropical nobo lo afecta Guajira y e region di Caribe

4717

Despues di e paso di horcan Iota den Caribe, afectando cu awasero fuerte nort di Colombia y specialmente e archipielago di San Andres, Providencia y Santa Catalina, e riesgo pa fenomenonan climatico nobo similar no a caba.

Esaki, teniendo na cuenta cu ta calcula cu e temporada di horcan ta extende te cu dia 30 di november, y hasta pa mas tempo, a alerta durante e mainta di diaranson e Instituto di Hidrologia, Meteorologia y Estudionan Ambiental (Ideam).

Awo, un alerta nobo emiti pa Ideam ta sostene cu den e proximo dianan por presenta un tormenta nobo di proporcionnan grandi, debi na e formacion di un ola tropical nobo cu na e momentonan aki ta den awanan Venezolano y cu por sigui su curso pa Caribe Colombiano, Yolanda Gonzalez, directora di e entidad, a splica.

“Ta trata di un ola tropical cu ta bin ta desaroya den e ultimo dianan. Pasobra di un probabilidad di desaroyo di 20 porcierto pa 40 porciento. Sin embargo, nos tin bon noticia cu den e ultimo oranan, a baha su probabilidad pa 30 porciento.”

Esey ta nifica cu, dado e condicionnan adecua, e actividad meteorologico por deriva den un tormenta tropical of un horcan nobo cu lo por afecta e parti nort di Colombia.

Te asina leu, no ta conoci cu claridad e forsa cu e fenomeno nobo aki lo tin ni si e lo alcansa e categoria di horcan den awanan Colombiano. Tambe, Ideam no a duna reportenan nobo riba con e ola tropical aki lo alcansa ni si e probabilidadnan cu por surgi un tormenta mayor, a aumenta.

Sin embargo, expertonan consulta pa e corant El Tiempo, ta sostene cu e probabilidadnan parce a disminui ya bao di 10 porciento. Tin cu aclarea cu no a confirma esaki pa autoridadnan competente, pa cual e recomendacion ta pa tuma e precaucionnan debido.

Mar Caribe ta mas cayente cu normal, locual a propio di e variabilidad climatico, na cual e Colombianonan tin cu prepara. Esaki ta un temporada di horcan historico riba e planeta cual a uni na e di dos temporada di awasero, cual a bin ta trece afectacion den un gran parti di e teritorio nacional, segun e experto Gonzalez.

Situacion di tempo na Aruba

Pa loke ta nos pais mes, awe nochi tempo lo ta parcialmente nubla cu chens pa un awasero local den marduga y mañan tempo lo ta parcialmente te temoralmente hopi nubla cu chens pa algun awasero local.

Situacion general di tempo pa e proximo 24 oranan:

Humedad persistente den e region lo pone de bes en cuando mas nubia pasa riba e isla. Den e proximo 24 oranan por spera algo di awasero na cierto partinan di Aruba.

Pa loke ta e estado di lama, esaki lo ta leve te modera na e parti zuid y modera na sectornan oost te cu noordwest, cu ta spera den e proximo 24 oranan. 

Olanan lo ta for di oost entre 3 pa 6 pia na e partinan oost te noordwest.

Pa esaki ta manda un aviso pa ocupantenan di boto chikito pa no aventura cerca di posibel awasero ya cu lama por bira hopi bruto temporalmente.

Tempo tropical significante:

Horcan Iota tabata situa na oost- zuidoost di Puerto Cabezas cu ta na e frontera di Nicaragua/Honduras. Iota ta move west y no ta un menasa pa region local.

Potencial di awasero pa proximo 24 oranan:

3 te 7 mm; localmente esaki por varia.

Pronostico di tempo pa proximo 3 dianan:

Tempo lo ta parcialmente nubla cu un awasero breve. Biento lo ta for di direccion generalmente oost y modera; basta fuerte den rafaga; temperatura (grado Celsius) lo ta un maximo di 30 y un minimo di 26.