Nos ta yegando fin di aña i manera ta konosí i por dedusí di sifra nan históriko, den e periodo aki e fenómeno di atrako (robo ku violensia) ta lanta kabes. En bista nos ya a konosé diferente kaso di atrako i ku konsekuensia nan fatal durante di aña, ta trese nos e preokupashon i inkietut riba e desaroyo ariba menshoná pa den fin di aña aki. E efekto nan negativo di kaso nan di atrako i violensia riba nos siudadano nan i tambe nos komersiante nan ta hopi traumatiko i sigur di mas pa kada víktima nobo. Tambe si konsiderá e efekto nan negativo di kaso nan di atrako riba nos ekonomia, esei no lo kontribuí na desaroyo di nos ekonomia kua tini hopi atenshon di gobièrnu. Kada kaso di atrako ta uno di mas.
Konsekuensia di temor reinante den nos pueblo pa no bira víktima di un kaso di robo ku violensia, lo desanimá nos pueblo di sali nan kas i lo redunda den ménos aktividat ekonómiko, kua lo no yuda stimulá nos ekonomia. E riesgo ku nos komersiante nan lo keda atraká den nan negoshi òf kas, por kontribuí na seramentu di negoshi nan i tambe pèrdida di kupo nan di trabou.
Nos no ke tampoko mas hende pèrdè nan bida ni tampoko famianan keda ku trouma òf desabilitá pa motibu di violensia di atrako. E siudadano mester tin e sentido di seguridat den kual gobièrnu lo garantisá seguridat di su kas, vehíkulo i mes persona. Ta konosí ku nos kuerpo polisial tin un skarsedat enorme pa loke ta trata polis i esei ta trese kuné ku bo no tin sufisiente polis riba kaya pa yuda kombatí kriminalidat. Fuera di esei tin hopi polis ku ta bai penshun i tambe tin ku pa un òf otro motibu no ta den kuerpo di polis mas. Esaki ta pone ku e efektividat di e trabou di polis ta bira ménos debí na hopi trabou ku e tin ku ehersé un tras di otro i tambe e servisio ku e tin ku duna na e pueblo.
Relashoná ku esaki Parlamentario pa frakshon sr Yaël Plet a manda un karta pa minister di hustisia ku e siguiente pregunta nan:
Minister ta informá ku tur aña di nobo e fenómeno di atrako ta lanta kabes, sigur den e último luna nan pa aña finalisá?
Minister lo òf a pidi refuerso otro kuerponan uniformá pa duna polis un man?
Minister ta na altura ku si tur departamento ku por yuda prevení krimin ta funshonando optimal?
Minister ta dispone aktualmente di un kantidat di polis ku lo por yuda pa garantisá seguridat di nos pueblo den e periodo di fin di aña aki?
Minister ta dispone di un plan stratégiko òf di kontingensia konkreto kon pa atendé ku e fenómeno di atrako di forma halsa siguridat i vigilansia den fin di aña?
En bista e periodo di karnaval ta ranka sali asina aña habri i su durashon ta kòrtiku, kua periodo tambe tini hopi moveshon i aktividat nan ekonómiko, Minister tin esei tambe na konsiderashon?
Parlamentario sr Plet lo keda pendiente pa kontesta di Minister di Hustisia.
