Offroad Foundation a tene un reunion cu e comision di Parlamento di Medio Ambiente y Infrastructura treciendo padilanti nan preocupacionnan. Pero tambe a presenta posibel solucionnan p’e situacion cu ta andando den Parke Nacional Arikok desde luna di mei ultimo, den cual a prohibi entrada di e vehiculonan aki den parke.
A informa e companianan di tour cu ta huur ATV y UTV cu esey no lo ta posibel mas, esta no por drenta e Park mas ni por haci uzo di nan facilidadnan. Desde prome di juni a stop di laga ATV drenta y dia 31 di october lo haci esaki cu UTV. Pa e companianan envolvi, cu tin debe grandi cu banco pa nan vehiculonan of cu agencianan di auto unda nan a “lease” e vehiculonan aki, awor ta para man na cabes. No solamente pa e aspecto financiero pero tambe laboral, pasobra ta decenas di tata di famia ta trahando den e industia aki cu ta core risico di perde nan trabou.
Miembronan di Parlamento a scucha Offroad Foundation riba esaki. Cada compania a haya un oportunidad pa describi e scenario realistico manera cu e ta awor den nan compania y con e lo bira si Parke Nacional Arikok mantene e mesun punto di bista manera a bin ta hibando e ultimo simannan. Es mas, e asunto aki ta di tal magnitud, cu Minister Andin Bikker como lider nobo di partido POR, a uz’e como un di e motibonan pakico a pidi Minister Marisol Lopez-Tromp tuma su retiro, debi cu e no ta sigui instruccion di partido pa soluciona e problema aki.
Segun Charlise Croes di Offroad Foundation, nan ta contento con e reunion a bay. Hopi pregunta a bin padilanti, cual Offroad Foundation a presenta diferente posibel solucion. Nan ta positivo cu e resultado y ta spera di no lo mester bay Corte p’e situacion aki. Pero si acaso Parlamento no logra convence Gobierno pa cambia e leynan, anto lo laga un Hues imparcial dicta un sentencia. Den pasado Gobierno a splica cu no ta Aruba, sino tratadonan internacional y protocolnan cu ex-Minister Otmar Oduber a bay laga atras caba, ta mustra cu mester adapta e maneho den Parke Nacional Arikok.
