Awe merdia a sosode un caso di maltrato na e edificio nobo cu Serlimar ta huur na Pos Chikito. Ey dos trahado a haya un discusion fuerte cu otro despues di ofensa y palabranan di discriminacion, cu a conduci na un partimento di wanta educativo pa planta respet y defende honor. Trahadonan disgusta a conta nos cu ta for di masha tempo caba a spera un escalacion asina, pues pa mayoria e susedido di awe no a bin di sorpresa.

Ta trata aki di Ophelia Beyde, campañado conoci di Minister Otmar Oduber, cu a haya un discucion cu un tal “Zengleng” na trabou. E lo a yama e homber pa “preto” den un forma masha humiyante y ofensivo den area di e oficina di mercadeo. Beyde tabata sinta cu un artista local, masha conoci, cu tur ora ta cana cu e coordinador di Minister. E mesun artista aki ta cara awendia di Serlimar, promoviendo riba e trucknan di sushi. E ta testigo di locual a sosode awe.

“Zengleng”, ora a tende e palabranan ofensivo expresa, el a bira puntra Beyde si ta cune e tin’e, riba cual el a contesta cu “si”. Consecuentemente e homber a bisa Beyde pa e lanta para y ripiti e mesun insulto pero awor den su cara. Beyde a mustr’e cu e ta haci esey tambe y su tras e homber a lanta man y a pasa e señora dos wanta, un cada banda di cara.

Segun informe for di Serlimar, e mesun trahado aki a yega di keha “Ophelia” caba den pasado, pa e mesun tipo di actitud asina. E ta un persona masha problematico y buscado di problema den e compania. Lamentablemente gerencia ta na altura y a haya mas cu un keho, pero ta cu nan mannan mara pasobra Minister tin man riba cabes di e señora.

Ta bon pa informa, cu den pasado, durante gabinete Mike Eman II, a presenta problema cu e mesun Ophelia Beyde aki caba. E tempo ey Serlimar a kit’e for di trabou, el a bay Corte y a perde su caso tambe. Hues a mustr’e cu e tabata robes y cu Serlimar a haci corecto di termina e relacion di trabou cune.

Asina campaña a start y el a opta pa uni na Otmar Oduber y a logra cu ora e ultimo a bira Minister, el a regresa na Serlimar. E tempo ey e Minister a considera cu locual a sosode cu Beyde tabata persecucion politico di AVP. Tur esaki sin tene cuenta cu e caso legal cu e trahado a perde den Corte. Su regreso a bin cu un nivel di rabia y tur dia ta percura pa bastante tension den e compania. E ta autor di varios discordia interno, hasta cu a conduci cu algun empleado a opta pa kita for di trabou.

Despues di e maltrato, e susedido a bira publico riba rednan social. Mayoria hende a hasta apoya e cant’i man, argumentando y hustificando cu ta for di masha tempo e tabata busca un escalacion asina. Claro cu maltrato no ta un asunto hustificabel, pio contra un hende muhe. Parce cu gerencia ta atendiendo e situacion na nivel interno y medidanan disciplinario ta un opcion awor. Di otro banda, por a evita e escalacion, si e Director procedente di Corsou tabatin mas experiencia di maneho y mas corahe pa para e Minister ora ta mete den asuntonan operacional na Serlimar. Awor e compania a dividi mas ainda, entre esunnan “pro” y esunnan “contra” e wanta educativo cu a cay awe merdia den gang na Serlimar.

Comments

comments