Odilia Jansen ta prome pensionado di Island Finance

Awe tabata un dia special pa Odilia Jansen, trahando na Island Finance. El a dedica 35 aña di su bida na Island Finance y a yega momento pa e disfruta bida den tur trankilidad. 

Durante un ceremonia den oranan di atardi, a honra e lealtad di Odilia Jansen, kende ta cu IF for di na inicio di e compania aki na Aruba. Island Finance tin 40 aña na Aruba y Odilia Jansen a cumpli 35 aña di servicio. Recovery & Collection Manager tabata e ultimo funcion cu el a ocupa. 

Banda di e funcion menciona, el a traha tambe como Brand Manager y hasta el a traha pa un filial di IF den exterior. “Mi ta hopi contento di tur loke cu mi por a siña den e compania aki,” el a bisa na final. E no ta bay solamente pasobra ta yega su edad di su pensioen, pero pa duna e hobennan chens pa tuma over y haya e experiencia cu el a logra den tur e añanan aki.

E ta masha gradici na Ivy Simon, Managing Director, kende a conseh’e hopi den su carera den Island Finance. “Pero a yega momento pa mi bay y laga espacio pa e otronan cu kier sigui crece den e compania,” Odilia a conta. Y a agrega cu e relacion cu tur empleado semper tabata bon. “Hopi danki, ta unico cu mi por bisa.”