Hues Comisario a prolonga detencion di Antoni Gario cu 8 dia mas

Dialuna mainta a hiba e musico Antoni Gario dilanti Hues Comisario. E cantante y musico ta deteni desde diabierna anochi relaciona cu un denuncia haci contra dje door di famia di un mucha muhe di 14 aña, pa actonan di inmoralidad.

Despues di su detencion, a interog’e pa varios ora, unda cu el a nenga di ta envolvi den algo, manera e denuncia ta bisa.

Awe mainta, manera e proceso ta exigi, a present’e dilanti Hues Comisario cu mester evalua si a cumpli debidamente cu e procedura y si mester prolonga e detencion. Esaki tabata e caso y el a haya ocho dia mas. E periodo aki ta duna autoridadnan e chens pa sigui cu nan investigacion, averigua si e denuncia ta basa riba realidad of no. Y si e ta basa riba realidad, si tin pruebanan cu por demostra esaki.

E cantante y musico mes ta sigui nenga e denuncia haci contra su persona.
E yiu di criansa di e musico, Ashrock, tambe ta deteni pa un delito similar desde mei, y mientrastanto ta cera na KIA.

Comments

comments