Ocho bus nobo a yega pa Arubus

Un cargamento di bus cu a wordo fabrica na Brasil, a yega Aruba dialuna anochi y ta cla pa wordo saca y transporta pa nan base na Arubus.

Manera ta conoci Minister encarga cu transporte Chris Romero recientemente tabata na Brasil pa mira e proceso di fabricacion di e busnan aki. For di comienso di aña a menciona cu gobierno lo inverti den e prome 15 busnan nobo, cual tabata tin destaho publico y un compania local a gan’e, cu tabata Jossy Motors cu a ofrece un bon prijs.

Dialuna e busnan aki a yega abordo di e barco Morning Carina, special pa entrega di autonan den Caribe, saliendo for di Sao Paolo siman pasa. Sinembargo e ocho busnan cu a yega no ta e cargamento completo. Segun por a compronde, otro siman e siguiente 7 busnan ta yega y asina ta completa e carga di e prome 15 busnan pidi na inicio di e aña’ki.

Segun e mandatario e busnan aki a sali 100 mil dollar mas barata pa cada bus pa cual a scoge pa esnan fabrica na Brasil. E marca d bus ta MAN, cual ta un marca Europeo, y sigur ta esun mas grandi awo uza na Europa, y e caroseria ta Mascarello. E bus a wordo construi den dos parti, caminda cu e caroseria ta wordo traha pa un parti na Cascavel, y e motor ta wordo traha y asambla tambe eynan.

E intencion ta e busnan aki wordo transporta diaranson pa sede di Arubus, pasa e inspeccion y poni mas lihe riba ruta.Tin cu remarca cu e busnan ta “milieuvriendelijk”. E lo cuida nos medio ambiente mas y mundialmente tur caminda ta bayendo den e direccion aki. E busnan aki tabata e unico cu a brinda e oportunidad aki cu e prijs mas abao tambe.

E aña’ki ta bay ordo 15 bus mas, y p’esey mester percura cu e grupo aki ta cla pa subi ruta prome cu pasa pa e siguiente proceso di ordo otro 15 bus. E mandatario anteriormente a bisa cu su meta ta pa logra cu tin 30 bus nobo prome cu fin di aña y mehora e servicio di Arubus. Pa otro aña mester tin algun mas cu mester cumpra y yega na e punto cu tin suficiente bus riba caminda.

 

Comments

comments