Contrario na e declaracionnan haci pa e doño di e bar awe dilanti Latin Passion Bar, nos compania nacional di distribucion di coriente, NV Elmar a reacciona mesora awe tardi. E ta desmenti cu e compania mes of un di su trahadonan, a haci trabou di instalacion di un generator como parti di servicio di NV ELMAR. Cu esaki e compania ta distancia di e acto aki y sigur di e consecuencia lamentabel cu esaki a trece cu ne pa un total di 4 victima.
NV ELMAR a tuma nota di e tragedia lamentabel cu a sosode ayera nochi den e bar na San Nicolas Tambe a tuma nota di declaracion di e propetario di Latin Passion encuanto presunto envolvimiento di un trahado di NV ELMAR referente conexion di un generator den e establecimento aki.
Conforme e aansluitingsvoorwaarden di NV ELMAR, su responsabilidad ta yega te na e meter di coriente y NV ELMAR no ta mishi den instalacion di coriente di cliente. Como tal conexion di un generator na e instalacion electrico di e establecimento no ta un practica of servicio permitibel pa trahadonan di NV ELMAR haci. E caso aki ta inusual y no ta forma parti di ningun procedura of servicio tecnico cu NV ELMAR ta brinda.
Dia 17 di juni ultimo, NV ELMAR a manda carta pa tur cliente pa atende cu cuentanan atrasa y a informa over areglo di pago. Na luna di juli, NV ELMAR a reanuda su operacion normal y como cu no a yega na un areglo a desconecta e servicio di coriente na dicho edificio. NV ELMAR ta manda palabranan di sincero condolencia na famia di e fayecidonan y ta desea pronto recuperacion na e otro dos victimanan.
