Hunta di Directiva di nos compania nacional NV Elmar a bolbe perde un caso, e biaha aki di persecucion politico contra su Hefe di Recursonan Humano. Dos siman pasa dia 23 di januari tabatin un sentencia pero diabierna ultimo dia 1 di februari 2019 a laga publica e sentencia aki di Corte den Prome Instancia di Aruba. Ta trata aki di Zelda Curiel, yiu di ex Director di Utilities Aruba, esta Juchi Curiel.
Abogado Doris Canwood a defende e interes di Zelda Curiel mientras cu NV Elmar a conta cu nan abogado di cas, Bufete Croes, Wever & Tchong, e mesun bufete cu ta representa Gobierno y mayoria compania di utilidad riba nos isla.
E caso sumario, manera nos a informa dia 30 di december ultimo den forma di primicia, ta relaciona cu suspension di inmediato di Zelda Curiel, despues cu el a anuncia na e director nobo, esta Tico Koolman, cu algun trahado a bin reclama persecucion politico eyden. Parce cu Alcide Wever, casa di e mesun director Tico Koolman, ta menasa y intimida trahadonan di e compania cu si nan no sigui liña di pensamento di e Gobierno nobo, cu lo kita nan for di trabou.
Claro cu e director recien apunta politicamente, tabata ansioso pa sa kende ta e trahadonan cu a keha su casa. E Hefe di Recursonan Humano a bisa cu el a priminti e trahadonan anonimidad y cu pesey e no por divulga nan nomber. Nan ta teme cu como cu ta casa di e director, cu lo tuma reprasalia contra nan mesora.
Pero gerencia a insisti cu Curiel cu e MESTER bisa cua trahado a durf di keha su señora pa intimidacion y menasa politico. Como cu Curiel a opta pa protega e trahadonan, a dune un carta di “warning” y un ora despues a sigui un carta di suspension sin cobra salario. Esey a sosode den final di december 2018.
Consecuentemente asina aña a bolter abogado Canwood a subi trapi bay Hues y a entama un caso sumario cu a wordo trata dia 10 di januari ultimo y di cual Hues a tuma un decision dia 23 di januari 2019 na fabor di Zelda Curiel.
Corte ta haya cu NV Elmar no a comporta manera un bon dunado di trabou, pasobra el a castiga e empleado dos biaha pa e mesun delito. E carta du warning y despues suspension sin salario, locual no ta posibel den un caso asina simpel y insignificante. Hues ta obliga Elmar pa paga Curiel su salario normal manera nada no a pasa y lag’e asumi su trabou mesora bek. Pa Hues ta hopi cla cu henter e asunto aki tin di haber cu “conflicto di interes” debi cu e acusado ta casa di e Director y como tal ta purba presiona e departamento di HR pa sa ken a keha pa por persigui nan.
E sindicato di NV Elmar cu normalmente ta sali mesora pa trahadonan, awo cu ta un caso cu tinte politico, a opta pa laga Curiel cay y no a sali defende e trahado. Ta bon pa señala cu e mesun sindicalista cu mester defende e trahadonan contra persecucion politico di e Gobierno na mando, ta riba payroll di Gobierno trahando como coordinador/consehero di Minister Glenbert Croes.
