Ta for di algun dia caba cu riba red social ta siguiendo un tendencia nobo den comunidad, di un homber parecido di India, cu ta fia bo celular pa haci un yamada y e ta coba den bo telefon. El a sosode sigur dos biaha den Starbucks, pa cual mester a laga siguridad pidi e “cliente” pa bandona e negoshi. Awe atrobe el a bolbe purba su suerte, pero awe si “su number a hunga” y Polis a detene mesora!

E victima e biaha aki tabata Regenald Felicia, kende a conta 24ora.com cu e tabata sinta mas o menos 10:20am na Stacion Principal di Bus na Playa, sperando su bus yega. E sospechoso a yega cerca dje y a papia cune na Ingles y a puntr’e si por fia su celular pa haci un yamada. E homber a contest’e cu e no tin carchi ni e tin data pa por bel for di dje. E sospecheso a contest’e cu no worry, pasobra abogado lo paga y nan mester bin busk’e, etc.

Porfin number di supuesto "hacker" di celular a hunga awe

Porfin number di supuesto "hacker" di celular a hunga awehttps://24ora.com/number-di-supuesto-hacker-di-celular-a-hunga-awe/

Posted by 24ora on Saturday, December 7, 2019

El a logra pa e homber a fi’e su celular y na dado momento a constata cu e tabata cobando den e celular sin haci yamada. No a scuch’e bisa “hallo” ni nada, ni pone na su horea. E homber a laga e celular cay abou, pero e telefon no a kibra. E homber a bisa doño di e celular cu e telefon ta potente pasobra e no ta kibra. Pero, entretanto ya e victima su alma tabata preto caba, pasobra di mes e ta fia su celular y awo e homber ta dal e celular abou purbando pa kibr’e. El a ripiti e mesun cos di dos biaha y e ora si e celular a kibra…pa cual e ora si e doño di e celular a activa y a ranca e celular bek for di dje y a bisa cu e ta bay denuncia e abusador aki.

Asina e pober celular a keda despues cu e sospechoso a dal e abou dos biaha, bisando cu e celular ta potente y cu e no ta kibra. Ta masha poco hende lo permiti fia nan celular y para mira e fiado dal nan celular na suela. Cualkier celular awendia costa mas o menos 500 florin, pues no ta barata mas!

A yama Polis cu a yega na e sitio pa brinda asistencia. Ey a topa cu e sospechoso y a detene mesora y a hib’e Warda di Polis Santa Cruz pa present’e dilanti un Fiscal Auxiliar. 
E victima a bay Warda di Polis tambe pa entrega keho na Recherche. E homber ta sinti cu e sospechoso ta coba den celular di hende y ta “hack” telefon di otro hende.

E victima di awe. El a bisa Polis e kier pa e homber paga pa un celular nobo pe. Tambe e kier sa kico e homber tin di coba den su celular, pues e no sa ki informacion e por a haya of manda pa otro number. Como cu e no ta un persona agresivo, e no a atende e caso di un otro forma.

Cu su detencion awe, ta spera cu por para e tendencia aki. Ta menciona cu e homber ta permaneciendo ilegal na Aruba y mesora a drenta mas keho di otro supuesto victimanan di e mesun tendencia aki, di gaña fia celular pa haci yamada, pa e por coba aden.

Comments

comments