Frank Arends, ehecutivo di Aruba Airlines, den entrevista cu 24ora.com a nenga categoricamente un noticia falso cu a keda publica localmente door di e.o. Diario basa riba declaracion di un supuesto pasahero, kende ta un persona cu tin problema cu Gobierno actual. E informe ta bisa cu Aruba Airlines tabata consciente di esaki y toch a transport’e pa Georgetown.
Arends a splica cu esaki no ta berdad. Aruba Airlines tin tres aña bulando e ruta Havana – Georgetown. Nan tin un wholesaler cu ta bende esaki y e ta estableci na Miami. Diferente agente di biahe ta bende nan ticketnan pa Georgetown y tur persona ta liber pa cumpra ticket.
Noticia riba Aruba Airlines relaciona cu gobierno Cubano ta 100% falso
Posted by 24ora on Saturday, June 22, 2019
Aruba Airlines mes no tin control di e venta. Pero si t’asina cu tin un regla cu mester entrega lista di pasahero 72 ora prome cu buelo, na autoridadnan. Nan ta investiga tur persona riba e lista. Si tin algo, ta informa e aerolinea cu e persona en cuestion no por biaha y ta menciona pakico. E mesun procedura aki ta wordo haci 24 ora prome cu e buelo y hasta esnan cu ta cumpra pasashi na ultimo ora ta wordo controla, prome cu e subi avion.
Den e tres añanan cu ta bula e ruta aki, nunca a baha un pasahero of a informa cu un pasahero no por biaha.
Di otro banda Arends ta recorda cu tin mas aerolinea ta bula e ruta di Georgetown y vice versa. Tin diferente compania Mericano y Europeo cu ta bula pa Cuba, y tin e mesun convenio cu Aruba Airlines tin. “Nos no tin vinculo cu ningun Gobierno, ni Cubano ni Venezolano, pa transporta ningun sorto di pasahero special. Nos ta bula cu tur e reglanan cu ta existi. Locual a sali den corant diahuebs pasa no ta berdad.”
Un corant na Spaña a publica declaracion di un pasahero cu a bisa cu el a bula cu Aruba Airlines, pero con e ora ela yega Spaña, Frank Arends ta bisa cu e no sa. Tur pasahero ta wordo confirma di por bula, cu aprobacion di autoridadnan.
No a sinti nada special cu e pasahero, ya cu el a biaha manera tur pasahero. El a cumpra su pasashi y el a haya aprobacion pa biaha door di autoridadnan. E noticia cu a keda publica diahuebs ta algo hopi straño. Ta bisa cu aparentemente e hende tin problema cu Gobierno di Cuba, pero Aruba Airlines no por haci nada si el a haya aprobacion pa biaha.
Aruba Airlines no tin vinculo cu locual a pasa, ni cu Gobierno Cubano y Venezolano.
E compania ta registra na Aruba, ta un compania Arubiano, aunke cu e doñonan ta di Venezuela.
