Apart di ta den funcion como advisor di Medio Ambiente pa Minister Otmar Oduber, sr. Robert Kock a wordo apunta pa fungi como presidente di e “Steering Committee”nan , pa locual ta trata e problematica di sushi na Aruba. E trabou ta encera guia e grupo, y duna nan algun conseho pa asina resolve e problema di sushi. E composicion di e grupo aki ta hopi amplio, tin departamentonan cu tur nan experticio nan aden, tin DNM, DIP, DLV, DOW, ROP, ROPV, e parti huridico cu lo yuda den e parti legal, Stichting Parkientenbos, ATIA, Serlimar y Sindicato STA tambe ta forma parti di e team aki. Mester menciona cu e grupo a wordo instala pa bin cu un solucion, no solamente pa Parkietenbos, aunke cu Parkientenbos ta esun mas critico na e momentonan aki, pero pa bin cu un solucion completo pa locual cu ta trata e dumpnan ilegal rond di Aruba y si mester bin cu leynan nobo of adapta e leynan cu tin caba y yega na solucionnan pa e desperdicio di sushi. Como presidente lo mi pusha e trabounan y percura pa tur partner envolvi traha riba e mesun liña cu otro, pa asina na final nos entrega un rapport cu Minister a pidi cu tur e consehonan y e opcionnan cu tin pa e problema di sushi na Aruba. Si bin cu un solucion duradero pa Aruba, esaki lo significa cu nos medio ambiente sigur lo haya un parti positivo y e parti di salud publico lo hunga un rol grandi specialmente pa e vecindario di Parkientenbos cu porfin lo por tin un solucion pa e problema cu tin decadanan caba andando y alaves nos turismo lo beneficia di e cambio aki. Importante pa menciona ta
cu pueblo di Aruba tambe lo hunga gran parti den e cambio aki, mirando cu nan participacion tambe lo conta den e proyecto aki. E parti di conscientisacion ta un parti hopi grandi den e proyecto aki, sr. Kock a termina enfatisando.
