Diadomingo atardi, un grupo di amigo, famia y e mayornan a reuni na Madiki Kavel, e luga tragico unda cu e hoben Ayden CJ Lanoy a perde su bida. E encuentro a tuma luga pa conmemora e hecho cu pronto lo haci dos luna di su fayecimento. Cada persona presente a hiba un bela, un simbolo di recuerdo y solidaridad den e momento dificil aki. E atmosfera tabata uno di emocion profundo, specialmente p’e mayornan di Ayden, kendenan ainda ta buscando consuelo den e perdida ireparabel aki.
E caso di Ayden Lanoy a cuminsa cu un persecucion cu a termina fatalmente, lagando un comunidad den luto. Durante di e encuentro, mama di Ayden a expresa su gratitud sincero na tur esnan cu a presenta pa mustra nan apoyo.
Aunke biento fuerte a impedi pa cende e belanan n’e sitio, el a pidi encarecidamente pa cada persona hiba nan bela cas y cend’e den nomber di Ayden, como un acto continuo di demanda pa husticia. E famia ta spera cu e acto aki di union lo sigui mantene e caso bibo den mente di comunidad y autoridad.
Den su discurso, e mama di Ayden a enfatisa cu e lucha pa husticia no lo stop. El a cuestiona e tardansa den e investigacion, specialmente mirando cu ta trata di dos polis envolvi. El a declara cu e inhusticia di e manera cu Ayden a perde su bida ta un dolor cu nan lo sigui sinti y pa cual nan lo sigui busca claridad.
Dos luna ta yegando: Pa recorda Ayden Lanoy famia ta cende bela
Publicado por 24ora en Domingo, 6 de abril de 2025
Cu un fe firme den husticia divino, e mama a priminti di lucha te na final, cu e speransa cu e berdad lo sali na cla y cu husticia lo prevalece pa su yiu. El a gradici tur presente pa nan sosten y a pidi nan pa sigui hiba e bos di Ayden mas leu posibel.
Pa mas detaye lesa TREMPAN.
