Norma salarial: Banco Central kier e mesun trato cu ta duna Procurador General

E siman aki Parlamento lo trata e proyecto di ley pa regla e norma salarial di ehecutivonan mas halto di empresanan estatal y instancianan publico y semi-publico. Ya caba siman pasa Stichting Algemeen Pensioenfonds Aruba (APFA) a indica cu pa bo por compara e salario di ehecutivonan halto cu e salario di minister-president, mester inclui e contribucion real na pensioen di e mandatario. 

E proyecto di ley no ta tene cuenta cu e suma cu Pais Aruba ta pone un banda pa garantisa e 70% di averahe cu e mandatario a gana mientras cu e tabata den funcion, mientras cu otro empleadonan cu tin un plan di pensioen den sector priva of publico ta contribui na esaki te e ultimo dia di trabou prome cu nan baha cu pensioen. Un mandatario ta completa su pensioen den 8 aña (96 luna), mientras cu otro mester traha 35 pa 40 aña pa haya su pensioen completo.

Banco Central ta urgi Gobierno pa inclui nan den e lista di excepcionnan di e ley aki. Te awor, miembro di Ministerio Publico ta exonera di e ley aki. Aunke cu ta premira cu e ley lo pasa e siman aki, ainda e no tin fecha pa drenta na vigor. Pa mas informacion, lesa e edicion di TREMPAN di awe.