Den e ultimo dianan aki tin varios rumor y noticia circulando rond di nos isla referiendo na e cursonan ofreci na EPI. Algun siman pasa caba redaccion di 24ora.com a ricibi keho relaciona cu intencion di Minister di Educacion, Endy Croes, di elimina algun opleiding na Colegio EPI. Pues, tabata durante un anochi di informacion pa mayor dje studiantenan di EPI cu a bin haya sa cu e sector Ciencia y Tecnologia lo no ofrece les mas di Bouwkunde y Werktuigbouwkunde.
Fuera di esaki, tambe lo a informa algun studiante cu lo baha e cantidad di klasnan den e opleiding di Culinary Arts y tambe cu no lo continua cu e opleiding di IT. Mas cu claro, e speculacionnan aki tin tanto mayor como studiante preocupa y ta pa es motibo nos di 24ora.com a sigui busca informacion pa tene comunidad altanto. Den un reaccion di director di EPI, Ryan Maduro, na Hits 100, el a splica cu en berdad tin hopi publicacion cu a sali den prensa, pero cu varios no ta cuadra cu berdad.
Innovacion y renobacion
Cu esaki el a desmenti e rumornan di cu EPI lo bay elimina e opleiding di IT y Culinary Arts y tambe esun cu ta bay tin trahado cu lo perde nan trabou. Locual si el splica si ta cu for di 2009 EPI no a renoba su curiculo, pues un curiculo cu tin mas cu dies aña bieu. Mientrastanto, el a splica cu beroepsonderwijs ta uno dinamico ya cu naturalesa di e beroepnan mes ta cambia y e educacion pa esaki tambe mester cambia y innova p’asina ‘sluit aan’ na e mercado di trabou.
Mas aleu el a splica cu esey ta netamente e problema cu e studiantenan di EPI ta enfrentando, esta cu nan no ta ‘sluit aan’ den e veld ni tampoco den ‘vervolgonderwijs’ pa motibo cu e curiculo ta bieu.
Na su turno, Claudia Whithfield, director di onderwijs di EPI, a clarifica cu berdad ta cu nan ta bay haci cambio den e curiculo di EPI, pero no tin ningun intencion di elimina of para e cursonan. Simplemente mester renoba e curiculo di manera creativo, “pasobra no tin fondonan, den esaki a dicidi e ora ta pa un aña cierto opleiding cera pa e docentenan di e dicho opleidingnan por haci renobacion y recapitulacion di con nan ta duna les.”
Pa un relato mas amplio, lesa edicion di TREMPAN.
