No tin ningun alerta di tsunami pa Aruba

Diamars atardi 3:10 PM ora di Aruba a tuma luga un temblor di magnitud 7.3 entre Cuba y Jamaica. Segun e National Weather Service (NWS) di Merca basa riba e parametronan di e temblor, olanan di tsunami por ta posibel pa e costanan situa dentro di 300 kilometer di e epicentro di e temblor. Esaki ta conta pa Jamaica, Cayman Island y Cuba.

Te asina leu pa Aruba no tin ningun alerta ainda y autoridadnan ta den contacto estrecho cu otro pa cualkier eventualidad.

Segun NWS pa loke ta Puerto Rico y Virgin Islands, no tin ningun menasa di tsunami. Autoridadnan local, Departamento Meteorologico di Aruba (DMA) y Bureau Rampenbestrijding Aruba (BRA) ta vigila e situacion di cerca.