Sindicatonan SADA, SPA y SIMAR a tene un reunion cu Gobierno, caminda a trece varios punto dilanti, entre nan a papia riba e asunto di cortamento den salario di ambtenaarnan. Awe den un conferencia di prensa, a duna nan banda di medaya di e encuentro aki.
Segun Edward Maduro, presidente di SADA, apesar cu e reunion a bay bon, tin hopi preocupacion cu ta keda zweef den aire, pasobra no tin mucho claridad. Y claridad ta locual cu kier haya pa e miembronan.
Na Aruba ta custumbraa cu hopi rumor y esey sigur a trece un preocupacion cerca e miembronan y tambe otro ambtenaarnan cu no ta miembro, pero cu si ta tuma contacto cu e sindicatonan pa haya informacion.
Dia 6 di november ultimo, a pidi un reunion cu prome minister, pero lamentablemente esaki no a cristalisa. Despues a informa e sindicatonan diamars ultimo cu el a opta pa yama tur e sindicatonan cu tin representacion di ambtenaar, pa asina duna e update pa loke ta trata e Landspakket, kico por spera y esaki sigur a opta pa uza e metodo aki pa hiba e informacion na e miembronan y e demas ambtenaarnan.
Claridad
Segun Maduro, un cos sigur por bisa ta cu pa aworaki, no por descarta cu lo por tin mas medida. Pero e 12.6% ta keda vigente “tot nader order.” Esaki no ta algo cu e momento ey, diamars cu a pasa, mester a acorda. E ta algo cu Gobierno a impone riba e trahadonan publico for di mei caba.
Gobierno a yega e tempo ey a bisa cu ta recorta 12.6% for di e ambtenaarnan “tot nader order”. No ta algo cu mester a bay vota p’e. Tabata algo cu tabata riba mesa caba y a bin bisa cu e “tot nader order” lo continua den 2021.
Aki ta caminda cu e sindicatonan a pidi y ta spera di haya un ‘toetsmoment’ den transcurso di aña con e situacion na Aruba ta sigui desaroya pa wak con ta sigui bay.
Si ta wak cu cos ta bay drecha poco poco, ta di spera cu pa e banda ey Gobierno ta optimista cu cos lo drecha, e ora a pidi pa tin ‘toetsmoment’ pa por sigui atende cu e parti di recorte di salarionan. Esey tabata un di e puntonan trece dilanti.
Pa loke ta e audiencia cu a pidi p’e pa dia 6 di november pa mira den ki direccion por wak un posibel compensacion bek pa loke ta e “inhouding” di e salario, nan a bisa lo siguiente. E ta algo normal cu den un situacion asina, ora cu entrega parti di e salario, como trahado e miembronan kier sa kico por tin como compensacion bek. Esey no ta nifica cu automaticamente ta haya algo bek.
Tempo di e “solidariteitsbelasting”, a bin logra algo despues di algun aña cu a sinta na mesa pa negosha indexering. E sindicatonan no kier warda, sino kier sa con Gobierno ta wak esey.
Lamentablemente no a haya un contesta di parti di Gobierno. Apesar cu di juni caba a pone e dos opcionnan ey riba mesa y gobierno a haci menos caso. E minister a bisa cu e situacion tabata fastioso, etc.
Ta spera awor aki pa haya un claridad pronto, y haya un update pa esaki.
