No tabatin participacion: ABV lo a prefera un specialista local como Director na Hospital

3398

“Nos a lesa ayera den un comunicado interno y den combersacion siman pasa diabierna ultimo a informa nos. Como e stakeholder mas grandi den Hospital, no a consulta nos at all, nos no a participa. Nan a notifica nos ora cu a scoge caba”, asina Gina Maduro, presidente di Arubaanse Bond van werknemers in Verplegende instellingen, ABV, a informa awe merdia durante un entrevista den Enfoke 90 cu Nelson “Speed” Andrade.

“Durante e pandema, e Lockdown, a opta pa sigui e proceso pa busca un director. Lamentablemente no a envolvi ABV den nada. Di otro banda, ABV ta consciente cu por lo menos un specialista a solicita pero a bis’e cu e cera e solicitud caba e momento ey”, asina Gina Maduro a conta.

Cuanto hende a solicita, ABV no sa. Maduro a splica cu Hospital a busa un compani na Hulanda pa recluta un director y a saca anuncio na Hulanda pa busca e candidato. A organisa henter e campaña di reclutacion dedica pa busca un Hulandes. Aki na Aruba no a saca aviso mes pa busca un director.

“Nos ta boga pa un local, despues di tur e añanan di mal experiencia cu directornan Hulandes. Nos ta kere cu nos tin hendenan capacita, pero si nos mesun hendenan cu ta den Raad van Toezicht ta contra nos mes, e ora mi ta puntra mi mes, ta con nos lo haya nos mesun hendenan den posicionnan clave”, asina Gina Maduro a puntra awe merdia na radio. E ta mira cu den posicionnan clave pocopoco ta cambiando pa Hulandesnan, lagando masha poco espacio pa crecemento di nos mesun yiunan di tera.

Cu e realidad aki awor riba mesa, e sindicato di empleadonan di Hospital, ABV, ta boga pa nan tambe haya un asiento den Hunta di Supervision di Hospital. Nan lo pone como condicion cu e miembro eyden no mag ta un trahado di Hospital, sino un experto cu lo representa interes di e trahadonan di Hospital. Mayoria compania asina tin un hunta di supervision, ta tripartite, den cual trahadonan tin representacion. Ya caba a entrega un carta oficial cu e peticion aki na e presidente actual di Hunta di Supervision.

Cu e retonan grandi cu tin awo, den cual lo mester corta 18 miyon florin pa aña, ABV kier ta sigur di por tira bista, supervisa y controla Hospital. “Hamas nos lo a permiti cu Hospital lo a yega den un situacion financiero asina malo. Esaki ta prome cu Covid, prome cu hacking, ta for di momento cu a kita Theo de Kool, a laga Hospital 15 luna sin un director financiero, cu consecuencia funesto”, di acuerdo cu e sindicalista.

“Awor aki no por tene reunion general cu trahadonan dor di Covid. Pero lo manda comunicado pa sinti nan opinion. ABV semper a boga pa un local asumi e posicion, si por un specialista, un hende cu experiencia den cuido, cu conocemento medico. Mi no conoce e director nobo pero a mira cu e no tin bestuurlijke ervaring, cu ta un minpunt grandi pe”, segun Gina Maduro.

Hospital net na e momentonan aki tin yen di reto, cu ta rekeri un director medico cu conoce e problemanan, conoce e cultura, sa con pa sali for di e problemanan aki y hiba Hospital na un siguiente nivel di crecemento.