Diasabra mainta a drenta un keho na organisadonan cu un cancion cu a sali den premiacion, lo ta un cancion existente. Mientras cu organisadonan tabata den pleno preparacion pa e di 2 anochi di festival, a cuminsa cu investigacion riba e asunto.
En berdad por a constata similaridadnan y Comision Promove Cultura a yama un reunion cu caracter di urgencia cu tur mayor y tur compositor den e categoria di e cancion en cuestion, e siguiente mainta.
Presidente di Hurado di e festival tambe tabata presente na e reunion aki. Na un otro momento a papia tambe cu e compositor en cuestion hunto cu otro miembronan di hurado y expertonan musical.
Reglamento di festival ta bisa textualmente: “E cancion cu e mucha participa cun’e, mester ta un composicion nobo. Na momento di e festival e cancion no por a wordo presenta caba”. Mas aleu e reglamento ta sigui bisa: “Incumplimento [di e regla aki] por causa descualificacion inmediato di e participante. Cuerpo di hurado, por medio di su presidente ta esun cu por tuma e decision aki.”
Keho a drenta despues di premiacion
Den e caso aki, e keho a wordo entrega despues cu ya caba e premiacion a tuma luga. Comision Promove Cultura a dicidi cu pa no perhudica e mucha, cu den e caso aki ta inocente y no sa miho di regla y di cancionnan existente, nos lo NO kita e premio di e mucha.
Despues di varios dia di investigacion y deliberacion cu diferente musico profesional, a yega na e siguiente conclusion:
E composicion en cuestion tin hopi similaridadnan di texto y musica cu un otro composicion existente di e mesun compositor. Pues aki no ta papia di plagio.
Kico ta plagio
Plagio ta ora un compositor uza material di un otro compositor bou pretencion cu e ta di dje. Pues, manera a menciona caba. No ta papia di plagio. Den e caso aki por papia di incumplimento di regla number 4, cual specificamente ta menciona cu e cancion mester ta nobo.
Decision:
Despues di hopi deliberacion y despues di a studia e reglamentonan bon Comision Promove Cultura a yega na e siguiente decisionnan.
Considerando cu:
– Tabata tin un incumplimento di regla, riba cual tin un sancion di descualificacion poni. – Descualificacion lo no por tuma lugar despues di premiacion sin perhudica un mucha. – No tin reglamento di sancion pa accionnan di hende grandi (p.e. mayor, compositor, areglista, musico) – Seriedad y credibilidad di e organisacion y e festivalnan ta sumamente importante y imperativo pa e existencia di dicho festivalnan
– Lo no kita premio di ningun mucha, tampoco descualifica ningun mucha cu a participa den e festival tras di lomba.
– Ta para tras di decision di e cuerpo di hurado tuma dia 8 di Maart 2019 y 9 di Maart 2019.
– Ta duna e compositor en cuestion un periodo di 3 aña di prueba, cual kiermen cu si durante e periodo di prueba e compositor aki kibra un regla di e festival un biaha mas, e lo keda prohibi di participa den e festivalnan pa tempo indefini.
– Lo revisa y adapta e reglanan pa purba mas tanto posibel pa evita mal comprendemento y mal interpretacion di regla y pa evita cu casonan asina tuma luga atrobe.
Pa Comision Promove Cultura, cu e decision aki e capitulo aki ta cera. Ta pidi mayornan, familiars y tur persona envolvi, pa tambe pone e situacion aki tras di lomba y mira esaki como un les pa cada un di nos pa nos ta mas conciente di nos actonan y alabes ta conciente di e daño cu palabranan emocional por causa na nos muchanan.
Tambe na prensa y periodistanan: e temporada di celebracion di nos dia nacional ta un temporada cu mester trece union. Nos Libertador a lucha pa nos tin nos simbolonan nacional, nos mes himno, nos mes bandera como instrumento pa logra union di nos pueblo. E festival aki tey pa yuda inculca e amor patrio den nos muchanan y nos hobennan. Ban no trece polemica den esaki. Haciendo esaki ta kibra e festival, ta kibra nos muchanan y ta kibra e amor patrio cu nos kier inculca den nan.
