No ta traha diamars tampoco: Protesta di trahado na Serlimar ta continua

Welga na Serlimar ta continua. Malcontento cu ta reina, no ta for di awo, pero for di basta tempo caba. Ainda por corda tempo cu minister Marisol Lopez-Tromp tabata na cabes pa algun tempo. El a purba pa sanea e situacion y cuminsa gara e toro na su cacho pa problema cu tabatin na Serlimar.

A kita e director y asina a sigui. Dado momento a baha Lopez-Tromp como minister. Prome minister a tuma e encargo di Serlimar, pero nunca a presenta n’e sitio pa mira y scucha dolor di e trahadonan di Serlimar.

No ta traha Diamars tampoco: Protesta di trahadonan na Serlimar ta continua

Posted by 24ora on Tuesday, October 26, 2021

Awo tin un gobierno nobo cu un minister nobo cu dialuna den oranan di mainta trempan mester a lanta fo’i su cama pa bin te Kockstraat pa atende cu un problema, pasobra e trahadonan a dicidi cu si no tin un oido na un manera pasivo, nan lo tuma accion y ta loke nan a haci.

Nan a lock e porta cu un candal, pero asina mes a corta e candal pa asina nan por a bay traha. Pero e protesta no a termina. Minister Ursell Arends a atende cu nan y durante henter dia e trahadonan a keda den protesta.

Diamars, nan ta sigui cu nan protesta. Nan kier e atencion y solucion di e problemanan cu kisas ta cos chikito manera safetyshoe, uniform, etc. Serlimar ta manera un yiu sin mama y ningun hende no ta worry cu ne. Siendo cu ta un empresa local cu ta recoge sushi di nos isla. Aworaki tur cos ta plat. Kisas tin hende no ta contento pasobra no a piki nan sushi. Trahadonan mester tuma accion, sino aki algun dia ta benta nan un banda y ningun hende no ta worry cu nan. Siendo cu nan tin un trabao importante pa haci pa nos pais cu ta mantene limpiesa.

Shopsteward di STA, Yuri Schwengle a comenta cu nan a haya reaccion di parti di e minister mes, manera cu ta conoci. Pero no a convence e trahadonan mucho. A bisa cu tin cu dun’e espacio pa traha, pero asina aki no. Tin un Raad van Toezicht cu un hende aden cu ta tuma tur decision. “Nos kier hende di nos den Raad van Toezicht e biaha aki y di Serlimar.”

A bisa e trahadonan cu no tin placa ni pa periodiek ni pa promocion. Truck tambe ta para sin por sali. Pero si tin placa pa paga un persona 700 florin pa dia y tambe placa pa cumpra un software pa 180 mil. Ta placa cu por a uza p’e trahadonan y cumpra piesa p’e trucknan.

Schwengle a confirma cu e pago di 700 florin ta uno sigur pa paga un persona cu ta pensionado di Setar, y riba dje no sa kico ta su funcion den e compania. Schwengle a comenta cu e no conoce mes.

Loke e trahadonan a dicidi ta cu nan lo keda para y nan guera lo continua. Tanten no haya loke nan ta pidi, nan no ta reanuda trabao. Loke e trahadonan ta pidi no ta cos pisa. Si gobierno por a drecha hopi cos, por drecha di Serlimar tambe. Schwengle a comenta cu e trabao duro cu nan ta traha, ningun hende no kier hacie. Schwengle no tin cuenta cu ta SEPPA of ta STA. Nan ta para pa Serlimar. Ta pidi p’e trahadonan di Parkietenbos, cera dump bin pariba y pa nan union bira mas forsa.