No ta permiti drumi memey caminda

Diasabra marduga, pa 4:05am, Polis a topa cu un auto marca Toyota modelo Yaris para memey di caminda, riba e caya bayendo Perle D’or Appartments na Bubali.

Ora cu Polisnan a bay check e chauffeur, a haye na soño y burachi. El a bisa e Polisnan cu su curpa ta cansa y a dicidi di para e auto pa e drumi un rato.

Polis a splik’e cu e decision no ta malo, pero memey di caminda no ta luga di drumi. Tambe, prome cu esey el a stuur burachi, loke ta contra ley.

Polisnan a dune un scual y a gui’e te na su cas, pa sigura cu e ta yega cas bon y cu e no ta sali mas pa pone trafico na peliger. E tabata rumbo pa cas ora su soño y cansancio a domine.