No ta mirando ningun maneho den gobierno pa loke ta Lotto

Tur hende a mira den comunidad cu Fundacion Lotto pa Deporte a bay corte contra Gobierno. Den tur e dos casonan cu tabata tin, gobierno a perde. Gobierno a tuma cierto pasonan na momento cu tabata sa cu tabata tin caso cu tabata wordo lanta contra nan.

Parlamentario Arthur Dowers a compronde hues, pasobra no por ta asina cu un hende ta lanta un caso contra bo y ta scoge toch pa bay contra di e decision cu hues lo por tuma door di nombra un directiva nobo. Esey a wordo afgestrafd door di corte di husticia. Por a mira hasta cu den un siguiente caso, corte a splica gobierno den un forma fini, con bo tin cu atende cu bo modulacion pa loke ta trata maneho di organisacion.

E minister encarga cu deporte a sali y ataca hues ferosmente, cu hues a stroba e maneho di deporte di Aruba den e añanan cu ta bin. Ta sumamente remarcabel cu no a mira ningun maneho di e gobierno aki, pero mucho menos di e minister di deporte pa loke ta trata e maneho di deporte.

A mira e minister aki na momento cu el a wordo nombra como minister, den e caso aki sr. Oduber. El a sali bisa cu Lotto pa Deporte, su miembronan mester wordo cambia y den e mesun reunion el a bisa cu e no sa ainda nada di Lotto pasobra tin cu bay lesa tur e stuknan. Na momento cu e minister a cuminsa papia di cambionan cu tin cu tuma luga den Lotto, e dia ey e minister no a lesa ningun stuk di Lotto, no sa kico ta e maneho di Lotto. E no tin ningun maneho. Awor aki, el a sali ataca hues, bisando cu hues a stroba maneho. E sistema hudicial di nos, cu ta ancra den nos constitucion, ta un sistema cu si acaso bo no ta di acuerdo cu hues como gobierno. Tin trias politica, caminda bo tin gobierno cu ta responsabel pa goberna e pais, parlamento pa controla y hues cu ta tuma decision na momento cu tin disputanan den sociedad. E disputanan aki por ta cu gobierno tambe y hues ta liber completamente for di gobierno pa tuma decision.

No ta na su luga cu un minister ta sali ataca hues y crea e impresion falso cu hues lo ta haciendo algo fout, siendo cu e caminda, na momento cu no ta di acuerdo cu hues, pasobra no ta asina cu mester ta di acuerdo cu tur decision di hues. Pero e caminda cu por tuma ta cu corte bek. Nos tin un corte di prome instancia, cu hues por dicidi, tin un corte mas halto cu tres hues por dicidi y tin corte di casacion caminda cu tin mas hues ta dicidi den un instancia mas halto. Si bo no ta di acuerdo cu Gobierno, bo ta cana un di e camindanan cu ta habri pa nos den nos sistema constitucional y bo ta percura pa, en todo caso, laga e sistema democratico keda para na final y mustra tambe comunidad cu mester respeta. Tin un caminda cu tin decisionnan ta wordo tuma na final y cu tur mester respeta y biba cu esaki. Esaki ta conta tanto pa politico, como ministernan. Ta compronde cu tur minister tin nan agenda personal, pasobra no a mira ningun agenda te awor aki na fabor di pueblo y ta compronde tambe cu nan tin cierto promesanan porta cu nan haci pa cumpli cun’e.