Den cuadro di e sucesonan cu a tuma luga awe, diasabra, encuanto yegada di un grupo di ilegal y tambe e dos curpanan cu a wordo haya, Gobierno a yama un conferencia di prensa di caracter di urgencia. Minister Andin Bikker a splica cu a yama un briefing hopi urgente ora cu a tuma nota di e acontecimentonan cu un biaha mas ta subraya con e problemanan cu ta tumando luga na Venezuela, ta afectando nos directamente.
Awe, algo cual hopi tempo no a sosode, tabata tin dos persona cu tragicamente a perde nan bida den e intento pa yega Aruba. Tur esaki ta bao di investigacion continuo. Informacionnan cu e minister por a comparti, cual ta basta conoci, ta e hecho cu tabata tin un boto cu a yega na nos costa. Tabata tin dos persona a fayece y tres a keda deteni.
Di nan declaracion tabata tin mas hende riba e boto. Ainda ta investigando y lo por tin mas detencion den transcurso di e dianan aki. E ta subraya e importancia. Dia 1 di October ultimo, a caba di conclui e proceso pa loke ta e servicio di helicopter pa leasing pa nos por tin nos propio helicopter.
Awe mainta a haya asistencia di e helicopter di kustwacht. Diahuebs ultimo minister Bikker a presencia e reunion di presidium di Kustwacht y tin cu bisa cu a haci un apelacion pa por tin mientras tanto cu ta bay haya e servicio di leasing di helicopter, ta haci apelacion riba e oranan cu pais Aruba tin derecho riba dje no solamente riba e helicopter pero tambe e Dash pa por contraresta e acontecimentonan aki sin precedente cu nos pais ta pasando den dje, cual ya pa hopi tempo no a conoce.
E ta rekeri mas input, mas ora pa loke ta trata tanto helicopter, sea di kustwacht, e propio helicopter cual den e proximo simannan ta spera di por introduci na Aruba. Los di esey, segun e Minister, nos leynan pa loke ta aanbestedingsregels ta poco anticua.
Pronto, prome cu fin di October, lo bay trata e aanbestedingsverordening nobo, cu en todo caso por agilisa e procesonan hopi mas lihe, ora cu tin demanda pa por ehempel e Cuerponan cu mester bin, den e caso aki, concluyendo e proceso pa e helicopter, pero tambe pa loke ta radar.
Concluyendo, e ta algo hopi preocupante, pero na mesun momento tragico cu por mira cu personanan, con cu bay bin, bidanan ta bay perdi den un proceso asina aki, cual ta hopi lamentabel.
E tin atencion di gobierno, tanto den e parti di vigila nos costanan, pero tambe e parti humanitario, mirando cu personanan ta yega na fayece, cual ta algo di lamenta den tur sentido y bao di cualkier circunstancia.
Awe, tur e dienstnan, cual ta regarda siguridad di nos fronteranan ta presente, cu lo keda vigila y monitorea tur esaki di cerca y siguramente lo intensivando e intentonan pa keda sigur anos frontera. Pronto cu por haya nos pronto helicopter, mientras tanto, ta haciendo apelacion riba kustwacht pa nan detacheer e dosnan cu ta staciona na Corsou y tambe e Dash pa por sigui vigila nos costanan debidamente y preveni mas tanto posibel pa e aanlandingnan aki por tuma luga.
Na final di dia, e situacion na Venezuela, ta conduci cu tin acontecimentonan aki y awe uno lamentabel, unda cu dos persona a fayece.
