Den e buki di Genesis 1:26, Dios ta bisa: ”Laga nos traha hende segun Nos imagen y semehansa,” y den versiculo 27 nos ta mira cu Dios a crea hende segun Su mes imagen, segun imagen di Dios El a crea hende, homber y e hende muhe El a crea nan. Anto Dios a bendiciona nan y a bisa nan: “Sea fertil y multiplica y yena e tera y haci esaki somete na bo y goberna riba e piscanan di lama y riba e parhanan di cielo y tur locual y riba tur ser bibo cu ta move riba tera.
Awor nos kier pa tur hende habri nan wowo y wak bon: Maske Adam y Eva a haci malo, Dios nunca a maldiciona Adam y Eva, Dios nunca a maldiciona locual cu E mes a crea.
Ora hende bandona caminda di Dios, nan ta habri porta pa diabel cu tur consecuencia cu lo bin, si nan no arepenti. No laga diabel gañado.
Diabel ta un mentiroso cu ta pone hende kere y bira algo cu nan no ta y asina kere den gran mentira.
Tene bon na cuenta: Dios no ta manda maldad den nos bida pa test nos, Dios no ta haci ningun hende adicto, ladron, pedofiel, matado y tur otro clase di inmoralidad cual ta para skirbi den 1 Corintionan 6:9 y tambe den Galationan 5:19-21.
Maldad no ta bin di Dios. E ta bin di e enemigo, cu ta hinca maldad den mente di hende ora nos ta spiritualmente na soño. Nos ta kere cu cualkier persona cu lesa esaki lo libera awe mes.
Wak pa simia di maldad no ta sembra den bo mente manera orguyo, egoismo, golos pa placa (cudishi), odio, vengansa etc. Esey no boluntad di Dios.
Ora bo ta haci cos orguyoso di solamente bo propio interes of bo ta haci maldad, keriendo asina cu bo ta castiga hende of bo ta stroba y perhudica otro hende, lo e duna su fruta. Y como esun cu a sembra lo bo cosecha. (Galationan 6:7-10). Corda bon no laga nos cansa di haci bon.
Hari cu hende den nan cara, pa solamente haya locual cu bo kier y despues bo no ta balora e persona, ta sintoma di manipulacion y identidad di hende shimaron.
Un animal shimaron, ta un animal cu ta bin come banda di cas, bebe awa, pero asina bo sali pa wak e, e ta core bay, pasobra e no kier ta den compania di hende. E ta prefera mondi.
Tin hende ta papia di Dios, pero ora mester tuma un decision, pa entrega nan bida na Dios, bira bek for di nan mal caminda, arepenti y biba segun Dios su boluntad, mesora nan tin mil y un excuus. Un persona asina ta shimaron.
Tuma un ehempel di un persona cu ta hopi malo of cu ta den un situacion hopi dificil y ta pidi tur hende haci oracion p’e. Y ora e bira bon e ta bay den mesun cos bek.
Bijbel tin masha hopi versiculo cu ta bisa: No gaña boso mes, no laga nan gaña boso. Esey ta nifica no laga satanas uza hende pa gaña bo.
Den Juan 8:42 -47, Hesus ta duna un splicacion fuerte di e hendenan cu ta laga diabel gaña nan y Mateo 13: 40-42, ta mustra nos e consecuencia final.
