Vanguard Aruba ta cla pa yuda bo cu e cambionan cu e Plan di Impuesto 2023 ta encera. E Plan di Impuesto 2023 a drenta na vigor dia prome di januari 2023 y esaki ta nifica cu tin diferente cambio importante pa bo como persona priva, doño di trabou y comerciante cu tin un empresa propio.
Siguientemente nos kier trece 8 cambio importante cu bo mester tene cuenta cu nan:
Introduccion di tarifa nobo di BBO
Un di e cambionan cu e Plan di Impuesto ta encera ta aumento di e tarifa di BBO cu 1% cual ta resulta den un tarifa nobo combina di BBO/BAVP y BAZV di 7%.
Reduccion di carga administrativo serca e comerciante chikito
P’e areglo pa comerciante chikito (kleine ondernemingsregeling) ta reduci e limite di entrada di Afl. 84.000 pa aña pa Afl. 50.000 pa aña y ta libra e comerciante chikito di e obligacion di entrega e declaracion y paga BBO/BAVP y BAZV. Na momento cu e comerciante chikito surpasa e limite di entrada di Afl. 50.000 pa aña e ta obliga di declara y paga BBO/BAVP y BAZV.
Regulacion nobo unda ta duna servicio
Normalmente un compania cu ta estableci na Aruba ta paga impuesto na Aruba riba su servicionan ofreci na Aruba. Actualmente t’asina cu si e compania no ta estableci na Aruba y ta bende su servicionan na un compania di Aruba, e compania stranhero no ta paga impuesto na Aruba, pasobra e ta estableci den otro pais. Cu e regulacion nobo tin un “cambio di sitio unda ta duna servicio”. Esaki ta nifica cu ta cobra BBO/BAVP y BAZV n’e compania di Aruba cu a cumpra e servicio for di e compania di exterior. E regulacion nobo ta valido pa por ehempel servicio electronico y servicio di telecomunicacion, television y radio. No lo cobra servicio via e-mail. E sistema aki ta uno conoci den e mundo di impuesto y ta aplica tambe na Hulanda y ta conoci como “verleggingsregeling”.
Bahada di porcentahe di entrada
E plan di impuesto ta encera tambe introduccion di un pakete di compensacion pa disminui e efectonan di inflacion. E compensacion p’e contribuyentenan individual ta encera entre otro cu ta baha e tarifa di e prome dos categorianan di impuesto riba entrada cu 2% y ta aumenta e suma liber di impuesto pa tur contribuyente individual y empresa chikito (eenmanszaak) di 28.861 florin pa 30.000 florin pa aña.
Salario minimo ta aumenta
Ta aumenta e salario minimo pa Afl. 1.893,40. Esaki ta encera un aumento di Afl. 78 pa luna.
Reduccion di tarifa di Winstbelasting
Ta baha e tarifa general di winstbelasting entrante 1 di januari 2023 di 25% pa 22%.
Regulacion di salario minimo pa director
E regulacion di salario minimo pa director ta encera cu ta considera cu un director ta ricibi un salario bruto cu ta usual pa e nivel y duracion di su empleo den su compania. Tambe e director tin cu paga loonbelasting riba e salario usual (“gebruikelijkloon”). E regulacion ta valido pa e director di un empresa huridico (por ehempel NV, VBA) y pa e director cu ta accionista mayoritario di e compania (“directeur grootaandeelhouder”). Pa loke ta compania nobo (start-ups) ta facilita “start-ups” door di stipula e salario di e DGA igual na e salario minimo pa ley di ‘minimumloon’. E salario di DGA ta valido pa e aña cu a establece e compania y pa e siguiente 3 añanan (en total 4 aña).
Aumento di Toeristenheffing
Entrante prome di januari 2023 a hisa e tarifa di toeristenheffing di 9.5% pa 12.5%. Esaki ta encera cu ta reparti un porcion di e entrada total di toeristenheffing entre ATA (57%), Pais Aruba (40.8%) y TPF (2.2%) teniendo cuenta cu e entradanan necesario pa ehecucion di e trabaonan di ATA y TPEF. Alabes a introduci un ahuste di inflacion di 10.2% pa e tarifanan di toeristenheffing aplicabel pa “timeshares”.
Airbnb
Ta mehora cumplimento di impuesto di acomodacionnan alternativo di cual Airbnb tambe ta cay bou di esaki. Entrante prome di januari por cobra toeristenheffing y BBV (“bijzonder belasting verblijf”) di e companianan aki cu ta ricibi pago directo di e huesped pa nan estadia na Aruba. Si e compania aki no ta estableci na Aruba e lo por asigna un representante permanente na Aruba (“fiscaal vertegenwoordiger”). Hopi hende ainda no a registra p’e proceso aki. Vanguard Aruba por yuda bo cu bo registracionnan na KvK, DIMP, BOI y alabes por yuda cu tur calculacion necesario mensualmente. Vanguard Aruba ta encurasha tur propietario di un Airbnb pa pasa serca nos pa asina nos por yuda nan cu e procesonan aki.
Vanguard Aruba ta un compania cu ta haci tur trabou administrativo manera entre otro yuda bo establece bo compania te na yuda bo traha bo cuenta anual. Nos ta traha cu diferente partner manera fiscalista y Registered Accountants. Si bo mester di guia pa yuda bo haci e cambionan rekeri pa bo compania door di e plan di impuesto nobo of bo mester cualkier otro ayudo administrativo of strategianan pa bo negoshi crece, ayudo cu payroll y human resources, bo por pasa libremente cerca nos na nos oficina situa den Dakota Shopping Paradise na Avenida Milo Croes #51, Unit 15. Tambe por mail nos na [email protected] of yama nos na telefon +(297)560-6196. Tambe por bishita nos Facebook page Vanguard Aruba.
