No kier tende mas di Rocco Tjon: SPA a manda yama tur polis pa reunion urgente

Mas trempan caba Sindicato di Polis Aruba a manda nan punto di bista den un relato di prensa, relaciona cu e ultimo desaroyonan den husticia di nos pais. Si resumi e puntonan, por conclui cu ex-polis, actual Minister di Husticia y Asuntonan Social, Rocco Tjon, ta score un “dikke onvoldoende” no solamente pa su maneho descabeya, pero mas ainda pa su plannan pa desintergra e cuerpo di polis unda e mes a traha den pasado. Cu awor e kier tira tur culpa riba ex-Minister Andin Bikker no ta aceptabel pa e polisnan, cu mester mira con ta spaar riba nan pero ta duna otro cuerpo, NCTVI, di e amigo personal di e minister, tur autoridad y tur luho pa por opera sin “bevoegdheid”.

Ta bin acerca e forma con e minister a reacciona siman pasa, door di chercha e sindicalistanan di no ta dokter pues no por bisa si tin “schimmel” den e edificio den Wilhelminastraat, tabata e ultimo druppel pa pasa e hemchi. Nan no kier reuni mas cu Ministrer Rocco Tjon y ta laga na e miembronan pa dicidi mañan ki rumbo ta hiba e lucha aki. Pasobra nan coleganan ta muri, otronan muriendo, ta baha nan salario, DRH ta maltrata nan tur dia bay y riba dje kier kita nan autoridad pa duna un grupo di campañado di e minister, no ta aceptabel mas. Por spera cu lo saca un carta pa Minister Presidente pa mira cu si e ta hala e minister encuestion un banda, of por spera escalacion di parti di e defensornan di ley.

E reunion ta convoca pa dialuna merdia 12:00 pm na Warda di Polis di Oranjestad den Wilhelminastraat, e mesun edificio cu ta matando polisnan ultimamente y cu tin por lo menos tres mas cu cancer awo. Y riba dje, minister a sali tenta nan cu a test y no tin schimmel, pues ta e polisnan lo ta gaña anto of exagera nan mesun morto! Riba nos pregunta di te ki ora e reunion ta tuma luga, un sindicalista a contesta: “Dios lo sa”.

For di algun skina den Cuerpo Policial Aruba, specialmente di esunnan trahando den e districto di Oranjestad, ta vocifera cu nan no kier sigui traha den e mesun edificio ey. Ta boga pa busca un otro luga urgente. Nada di cu mester bay drecha, bay pidi destaho publico, bay warda un aña mas pa otro coleganan muri prome: Nan kier accion e luna aki ainda!

Sindicato di Polis Aruba (SPA) ta haci un apelacion na tur miembro, pa sali mustra cara awo! Si keda keto of sconde den wardanan di polis, ta e mesun politiconan aki lo dera bo djis. Nan ta gaña bo yen di cos den campaña, bisa bo cu nan sa tur problema di polis, pero ora nan asumi poder nan ta lubida nan promesa y nan pechi. Pues, awo ta ora pa corda nan ken a pone nan eynan y ken lo baha nan di e puesto tambe debi na nan mesun incompetencia y arogancia!

Tocante SPA

Sindicato di Polis Aruba ta existi desde aña 1986, ora Aruba a bira pais y nos a conta cu nos mesun cuerpo di polis. Prome cu esey Aruba tabata parti di Cuerpo Policial di Antias Hulandes y como tal e polisnan tabata miembro di e sindicato di polis di Antias, NAPB. Nan tin mas o menos 485 miembro di e 600 empleadonan (polis y civil) cu ta traha na Cuerpo Policial di Aruba. E prome presidente di SPA tabata Isidro “Chido” Maduro qepd. Otro polisnan cu a ocupa e puesto di presidente tabata Coizy Krozendijk, Victor Simon qepd, Eric Zaandam qepd, Miguel Maduro, Angelo Davelaar, Edgar Maduro, Jose Dirksz y awendia Rodney Solognier.