No tin ningun negosiacion tumando lugar cu un operador nobo, pasobra ainda no a scohe un operador manera e proceso di RFP ta stipula, asina Aruba Airport Authority N.V. (AAA) a reacciona relaciona cu publicacionnan rond di e proceso di destaho pa opera nos aeropuerto priva.
AAA a tuma nota di un articulo publica den medionan di comunicashon local riba 6 di December 2017 tocante e proceso di haci oferta pa por opera e terminal di FBO/General Aviation (GA) na Aeropuerto Internacional Reina Beatrix.
E acuerdo di concesion cu actualmente AAA tin cu Universal Aviation Aruba N.V. lo termina 31 di December 2017. Como resultado AAA publicamente, tanto localmente y internacionalmente a emiti e proceso di “Request For Proposal” (RFP) na September di 2017. Proposicionnan a wordo ricibi siman pasa for di e varios companianan interesa den opera e terminal di FBO/GA.
Actualmente AAA ta evaluando tur e proposicionnan ricibi y e decision final ta plania pa wordo tuma dentro di algun siman.
Mester agrega cu a lanta interogatorio despues cu diabierna ultimo a sali un avion priva cu un di e interesadonan pa opera e Aeropuerto priva di Aruba. Den e avion aki a bula e partner Mericano, e partner local y Minister Otmar Oduber. Tur compaña pa nan casa. E vuelo tabata di Aruba pa Fort Lauderdale. Kico e mandatario tin di haber cu e proceso di destaho of di e compania interesa den maneha e terminal di “General Aviation” no ta conoci. Cu un Minister ta acepta pa bula den un avion priva di un compania cu kier gana un destaho di Gobierno (AAA ta un compania di Gibierno) ta un asunto hopi cuestionabel, specialmente si e grupo aki gana e destaho despues.
Ta bon pa informa acerca cu un di e companianan participando den e mesun destaho aki pa opera e terminal di General Aviation ta SkyPort Aruba, un compania cu ta pertenece na FMSA y RdA. Manera ta conoci, FMSA ta distribuidor exclusivo di combustibel na avionnan na Aeropuerto. FMSA ta pertenece na Refineria di Aruba NV, cu ta 100% di Gobierno di Aruba. Pues, den cierto forma, Gobierno mes ta interesa pa via SkyPort maneha e Aeropuerto priva di nos isla.
Pero, un Minister ta hopi cerca di e grupo AGS/FAST y WindsorJet, cu awor ta percurando pa basta duda riba e proceso di imparcialidad di e destaho. Separa di Ignacio Martinez, tambe ta mencionando nomber di Jorge Colindres, kende tin contract cu Gobierno pa bandera avionnan na Aruba y kende tambe tin masha bon relacion cu Minister Otmar Oduber. E tambe ta den e grupo aki pa maneha e terminal di Aeropuerto priva.
Straño ta, cu maske AAA no a tuma un decision ainda riba kende lo cuminsa maneha e terminal entrante 1 di januari 2018, cu entretanto ya trahadonan di AGS y di Fast ta trahando caba eyden, di acuerdo cu e mesun trahadonan di Universal, cu entretanto a hiba nan doño di trabou Corte.
Segun e maneho nobo di Gabinete Wever-Croes, Aeropuerto ta resorta bou responsabilidad di Minister Dangui Oduber.
