Ministerio Publico di Aruba a tuma nota di noticia den media Venezolano cu autoridadnan di Aruba lo a tuma mas cu 900 kilo di oro procedente di Venezuela den beslag. E oro aki lo a wordo trafica pa Aruba den un avioneta priva. E piloto y personanan den e avioneta lo ta den detencion pa extradicion na Aruba. Ademas lo a detene funcionarionan Arubiano relaciona cu e goudvangst. “E noticia aki den media Venezolano no ta basa riba berdad. Autoridadnan Arubiano nunca a tuma casi un tonelada di oro den beslag abordo di un avioneta Venezolano. E noticia ta falso”, asina Ann Angela, vocero di Ministerio Publico a indica.
E pagina di noticia webparaguana.com.ve a informa for di den weekend caba di e caso aki. Awe nan a pone e parti di Ministerio Publico cu a desmenti e noticia, pero nan ta insisti cu nan fuente ta corecto y cu a haya 932 kilo di oro puro na Aruba, riba un avioneta cu a sali for di Mexico pa nos isla. E oro, segun e media Venezolano, ta procedente di Venezuela.
Mester menciona cu algun investigacion cu nos mes a haci via nos contactonan ta confirma cu no tabatin un hayazgo di e magnitud aki na Aruba, esta casi un ton di oro. Di unda e “fuente” a sali cu su informe no ta conoci, pero aki no a haya oro y no a detene ningun sospechoso pa e delito aki tampoco.
