E fenomeno di plachinan cu no ta original, esta un plachi den forma di un pida papel, un pida carton of un sticker ta bira ultimamente manera un free for all.
Segun vocero di Departamento di Impuesto, Meverly Romar, den añanan anterior, DIMP tabata duna cierto clientenan un carta di permiso cu ta dunanan e autoridad pa nan mes laga traha un plachi, si acaso no tin nan plachi di number den stock, of si acaso por ehempel nan a horta nan plachi di number of nan tabata den un accidente y e plachi a kibra y nan ta acudi na DIMP pa un plachi nobo.
Pa tanten cu ta laga traha e plachi nobo, tabata duna e clientenan aki un carta di permiso cu ta duna nan e apoderacion pa nan por traha un plachi nan mes.
Pero esaki den transcurso di aña el a bira un Free for all. Tur hende a cuminsa pone sticker riba nan auto. El a bira algo cu a bay completamente for di man.
Entrante 2019, Departamento di Impuesto no ta otorga ningun carta di permiso mas pa un automobilista traha un number su mes, si acaso no tin su numbernan den stock.
Awor aki, personanan cu ta bin registra un vehiculo nobo of ta pidi un number nobo, tin suficiente plachi di reserva den stock Por otorga plachinan nobo inmediatamente y pa e personanan cu kisas nan a horta nan plachi of e plachi a kibra por ta door di un accidente, e ora ta laga traha e plachi. E empresa cu ta haci esaki, ta haci’e mesora.
Awor aki ta tumando e maneho cu no ta duna e automobilista un carta di permiso mas pa e mes bay traha un plachi. Esaki ta nifica tambe cu tur auto cu por ta riba caminda, cu tin un plachi temporal den forma di un carton, den forma di sticker of den cualkier otro forma, esakit a prohibi.
P’esey tambe kier a pidi automobilistanan, comunidad di Aruba en general pa paga tino riba e tipo di fenomenonan aki y si acaso un auto wordo señala riba caminda, pa avisa Cuerpo di Polis riba esaki, pasobra esaki no ta permiti.
Di parti di Departamento di Impuesto, ningun hende no ta autorisa pa traha e plachinan nan mes.
Despues di dia 28 di Februari, lo bay manda un carta pa Cuerpo di Polis, informando nan oficialmente cu e fecha di pago a pasa y cu si nan por durante nan controlnan, cu nan por paga tino na autonan cu tin un plachi so riba e auto of tin dos diferente number.
Un number dilanti y un number patras. Tambe e plachinan cu ta ilegal, esta e plachinan traha, den forma di sticker. Ta detayenan cu ta bay pidi Cuerpo di Polis pa pone atencion riba dje, pasobra e situacionnan aki ta situacionnan cu no ta permiti mas.
Consecuencia
Den caso cu polis haya un doño di un vehiculo ta coriendo cu su auto, haciendo uzo di careteranan publico, cu plachi cu ta falsifica of ilegal, e por haya un process verbaal eynan mes. E ta haya un boet pa esey, segun Romano.
