Ningun decision a cay awe pa nombra Altocomisario di Polis

Ex Minister President Nelson Oduber, papiando cu Alto Comisario Dolfi Richardson y Comisario Vanessa Tjon, kende ta casa di Lider di Fraccion di MEP, esta e ex Alto Inspector Rocco Tjon.

Contrario na varios rumor cu a cuminsa core for di ayera caba, relaciona cu posibel nombracion di Vanessa Kock como Altocomisario di Cuerpo Policial Aruba, awe nos a haya confirmacion cu esaki no a sosode. Fuentenan for di Bestuurskantoor a sigura cu e reunion semanal di Conseho di Minister no a tuma luga awe y a move pa diabierna. Por lo menos riba e agenda di awe, e topico aki no tabata poni. Esey no nifica cu e no por a bin durante e reunion si. No tin confirmacion tampoco cu diabierna awo lo aproba dicho nombracion.

Hecho ta cu na e momento aki, no tin ningun otro candidato den Cuerpo Policial Aruba cu lo ta capacita pa e funcion y ni tampoco cu ta carga sosten y respet di e polisnan. Banda di Kock tin dos persona mas den funcion di Comisario di Polis, esta Irma Gordon y Trudy Hassell. E ultimo lo regresa den Cuerpo Policial proximamente despues di a tuma algun tempo di vakantie, ora el a tuma su retiro como Hefe di Guarda nos Costa.

Mester menciona cu Mando Policial awendia ta hopi menos ekipa na hende, compara cu antes, siendo cu net awo e retonan ta mucho mas cu antes. E realidad di e explosion socio-economico dilanti nos porta na pais bisiña Venezuela, sin lubida e retonan economico cu e crisis ocasiona pa Coronavirus, ta pone un presion hopi mas grandi riba henter nos Cuerpo di Polis. Antes tabatin Dolfi Richardson como altocomisario y tres comisario bou di dje. Awe nos tin un altocomisario interino y un solo comisario bou di dje, pa maneha hopi mas reto compara cu antes. Cu binmento di Trudy Hassell bek, ta duna Mando Policial por lo menos un di e dos mannan cu a perde den e ultimo añanan aki.

E nombracion di Vanessa Kock como tal no ta bin como sorpresa, specialmente despues di baymento di Andrew Hoo como altocomisario di Cuerpo Policial Aruba. Probablemente diabierna awo lo concretisa e nombracion aki, pa cual ta rekeri aprobacion di Conseho di Minister di Aruba. No ta conoci si e nombracion lo ta final, of ta sigui conseho (7492) di Departamento di Recurso Humano di dia 17 di september 2020, pa lag’e cana man den man cu un trayecto di maneho, incluyendo haci un “management-assessment pa determina su bandanan fuerte y zwak y pa corigi nan tambe. Den e mesun conseho, DRH ta conseha pa laga Kock un aña mas como altocomisario interino y pa probecha pa den e aña ey pasa e trayecto di mehoracion den maneho y haci un “vertrouwensonderzoek” riba dje.

Di otro banda, Vanessa Kock ta e comisario cu mas aña di experiencia actualmente den encarga cu e funcion, aunke como suplente. Tambe el a demostra for di luna di maart pa awo, net den e crisis economico, social, laboral y di salud mas grandi cu nos pais a conoci, el a demostra compromiso, liderazgo y determinacion.

A purba haya comentario for di Minister di Husticia, mr. Andin Bikker riba e asunto aki awe, pero no a logra ainda. E departamento di relacionnan publico di Ministerio di Husticia a confirma cu no tabatin ningun decision awe den Conseho di Minister pero no por a confirma cu dicho nombracion ta poni pa diabierna awo den e siguiente reunion.