Den un stal el a nace.Loulou ta lansa su cancion di Pasco durante di e programa di Tio Layo. Pues e ta debuta y sigui cu un herencia cu su Abuelo a cuminsa y asina ta drenta farandula di Aruba oficialmente.Loulou ta nieta di Sr. Rudolfo Valentino ‘Vale’ Croes (q.e.p.d) y a nace den un cuna artistico, durante ensayonan di e famoso show di su welo na cas di cultura. Loulou a dal su prome stapnan dunando tur hende di pensa cu di berdad e mundo artistico e lo conkista.
Loulou for di un edad super chikito a compaña su mama Joanna Croes cu a actua den algun proyecto di documentarionan. Asina LouLou a subi stage cu edad di 3 aña pa prome biaha y a interpreta e cancion di nos mama di Cultura Bernadina Growell, ‘Pilar’.Na 2017 Loulou a conkista e corona di Baby Cultural na edad di 4 aña y e tabata tin un reinado precioso na unda Loulou a te asta representa Aruba durante Dia di Rincon na Boneiro y asina conkista curazon di e Bonerianonan cu su sonrisa y carisma.Na 2019 Loulou den su afan pa ta Reina un biaha mas, a participa pa Reina Infantil di Noord y aki a gana e titulo di primera finalista y el a baila orguyosamente den tur parada.
Na final di e mesun aña Loulou a participa pa un corona diferente, aki Loulou a participa pa e corona di Dande aportando na nos música típico y nos cultura.Apesar cu 2020 tabata un aña hopi difisil, toch Loulou a haya e oportunidad di saca un cancion di Pasco: “Den un stal el a nace”. Esaki tabata un iniciativa di Robert Maduro, Jonathan Vieira, y Maikol Lugo cariñosamente yama MikiDrums (cu porcierto ta nominado di Latin Grammy e aña aki) cu a logra e proyecto aki door di no solamente realisa e grabacion di cantica pero tambe a produci un video bai direccion di Dani Cruz na unda por mira LouLou cu tur su zjeito ta canta na Aruba Ocean Villas y Tres Trapi.
Un danki ta bai pa e Compositor: Robert Maduro, Areglista Maikel Lugo cu a haci e mastering y mixing, IQ Labs di Ivan Quandus cu a graba baho, Doedel Sofia cu a graba cuarta, su “vocal coach” Ruth Gaari y Coro cu ta Ruth Gaari su mama Joanna Croes.E sponsor pa e bunita projecto aki ta: Vieira-Henriquez Foundation (I.O), un fundacion pa Arte y Musica di Aruba.
