Algun aña pasa, e idea di cuminsa un movemento pa empodera hende muhe a nace cerca Nicole Godett, miho conoci como ‘Empowerment Queen’.
Maske Nicole tabata cla pa cuminsa cu esaki mesora, miedo y duda propio a domina y a pone Nicole tene esaki na djis un idea. Den combersacion cu su grupo di amistad, miho conoci como su tribu, ela haya e curashi necesario pa duna e idea aki bida.
Asina e Facebook page y Instagram account “Empowerment Queen” a lansa riba dia 24 di Mei 2018, na honor di e feliz memoria di su querida mama, Sylvia Alicia Godett cu a fayece exactamente e dia ey 7 aña pasa. E mision di Nicole ta pa crea un ‘sisterhood’, unda cu hende muhe ta sostene, inspira y empodera otro. Tanto e Facebook page y Instagram di Empowerment Queen por wordo usa manera un plataforma na unda hende muhe por sinti nan mes sigur di nan mes. Cu videonan positivo, quotes y poema, Nicole ta empodera y inspira e ser femenino.
Orguyosamente, Nicole Godett ta eherce su trabou como trahado social y tin un perspectiva feminista. Nicole ta kere fuertemente den advoca y empodera esnan cu tin mester di esaki y como profesional su motto ta “Mi ta desea di cambia mundo door di empodera un persona cada biaha”. Den e futuro sercano,Nicole lo kier presenta varios eventonan social y tayeranan cu ta promove educacion y hermandad. E ta desea pa e ser femenino ta mucho mas amabel cu otro, pa sostene otro embes di caba cu otro sin tin un motibo valido pa esaki. Nicole su pensamento ta, cu e futuro ta femenino y cu hunto nos muhernan lo lanta cabes un biaha mas … Cambio ta na caminda! Sigui Nicole riba Facebook y Instagram na @empowermentqueenaruba of manda Nicole un email pa mas informacion of colaboracion na [email protected].
