A detene por lo menos cuater persona na New Zealand tras e tiroteo den e interior di dos mosque den e ciudad di Christchurch, e prome minister, Jacinda Ardern a bis, kende a alerta cu por tin mas persona implica. Prensa local a informa cu e atakenan a laga por lo menos 49 morto.
Ardern tambe a bisa cu “tin diverso scenario envolvi” den e suceso, loke a obliga polis pa desplega rond di e otro mosquenan di e ciudad y a yama e poblacion pa keda den nan cas.
A detene cuater persona relaciona cu e atakenan, segun fuentenan policial. Esnan aresta tabata tres homber y un muhe, riba kende a haya artefactonan explosivo den nan auto y a alerta riba e posibilidad cu e incidente no ta limita na e ciudad.
Polis di New Zealand a admiti cu a registra “varios victima” den e atakenan riba e dos mosquenan.
“E victimanan fatal a sosode den dos luga diferente,” den dos mosque di e ciudad di Christchurch, comisario Mike Bush a bisa.
Di acuerdo cu prensa local, tin or lo menos 49 persona morto. Como consecuencia henter e isla zuid di New Zealand ta blokia mientras cu polis ta busca e responsabelnan pa e tiroteo.
Den un prome momento, e prome minister Neozelandes a evita confirma e cantidad di victima den e asalto, cual el a defini “un acto di violencia extraordinario y sin precedente”, den cual el a cualifica como “un di e dianan mas scur di New Zealand.”
Un di e tiroteonan a wordo retransmiti atrabes di e rednan social pa e asaltante, kende ta aparece cu paña militar dentro di e centro di culto tirando riba varios persona cu un arma automatico unda cu el a cambia e cargador por lo menos dos biaha.
Riba rednan social tambe ta circula un manifiesto di e asaltantenan contra e musulmannan.
Entre 300 y 500 persona tabata den interior di e mosque ora cu un homber cu un arma automatico a tira por lo menos binti biaha, di acuerdo cu varios testigo, indicando un cantidad di mas di 30 victima.
Segun un testigo, e asaltante tabata tin un helm, bril y paña militar y a uza un arma automatico cu cual el a realisa e masacre.
Entre e fielnan cu tabata den e mosque tabata tin varios miembro di e ekipo di cricket di Bangladesh, cu e mainta ey a disputa un encuentro contra New Zealand.
E comisario di polis, Mike Bush, a informa cu tur scol di Christchurch tabata cera como respuesta na “un serio incidente cu arma di candela.”
“Polis ta urgi pa personanan den e centro di Christchurch evita permanece riba caya y raporta cualkier comportacion sospechoso,” el a añadi.
Un testigo a bisa na un radio local cu el a scucha varios disparo y di inmediato a mira cuater persona tira abao, “cu sanger tur caminda.”
Tras di e tiroteonan, Polis Neozelandes a a haya explota dos saco di forma controla na Auckland, na e isla nort.
Bao di e alerta maximo den henter e pais, e agentenan a indica cu e saconan, haya na un stacion di trein di Britomart di Auckland, tabata contene solamente materialnan di construccion.
“Esaki solamente por wordo describi como un atake terorista,” e prome minister, Jacinta Ardern a afirma, riba e tiroteonan den un comparecencia retransmiti en directo for di Wellington, den e isla nort.