Awe nochi net prome cu e orario di Toque de Queda, pues faltando algun minuut pa 10:00pm, a sosode un accidente na e T-Kruising di Ponton net dilanti di “Wema”. E autonan envolvi ta un Toyota modelo Tercel color blanco numera A-3069 y un Suzuki modelo Vitara numera A- 36676.
Un total di 2 unidad di Cuerpo di Bombero a presenta na e sitio pa por a libera esunnan cu a keda pega den e Toyota Tercel, mientras cu 3 ambulance a presenta pa brinda asistencia medico y varios unidad di polis pa cera e area pa autoridadnan por traha. Na final a transporta 4 victima pa hospital, pa ricibi cuido medico avansa.
Polis awor ta investigando con e desgracia a sosode, aunke cu e prome indicacion ta mustra di tin falta di preferencia. Di otro banda, mirando e impacto, no por descarta cu velocidad halto a hunga un rol tambe.
Bisiñanan para band’i caminda tabata comenta cu ultimo dianan, specialmente despues cu Gobierno a reintroduci Toque de Queda, ta nota cu den e ultimo minuutnan automobilistanan ta core masha duro mes pa por yega cas na tempo. Habitantenan bibando riba e caminda di Ponton ta raporta un scenario estilo dragrace con autonan ta pasa “bula” dilanti nan cas pa por yega nan destino prome cu haya multa.
Un apelacion ta bay na publico pa tuma camind’i cas mas trempan pa evita e tipo di accidentenan asina. Miho bo yega un minuut laat cu Bo no yega nunca mas!
